साठवण तलावातुन विद्युत पंपाची चोरी

सांगवी मांळुब्रा साठवण तलाव हा अज्ञात चोरट्यांसाठी मोटार चोरीचा अड्डा बनला आहे. यापूर्वी या तलावावर संतोष मगर, आबाराव दुधाळ, मधुकर मगर, सुधाकर वडणे, तुकाराम मगर, जालिंदर मगर यांचे विद्युत पंप, केबल वायर अज्ञात चोरट्यांनी चोरून नेले होते. त्याचा तपास अद्याप लागला नाही. चोरटे अंधाराचा फायदा घेऊन विद्युत पंप लंपास करीत आहेत. मागील आठवड्यात तुकाराम मगर यांचा विद्युत पंप चोरीस गेला. त्यास आठ दिवसांचा कालावधी उलटत नाही तोच गुरुवारी मध्यरात्री अंधाराचा फायदा घेऊन चोरट्यांनी सांगवी गावातील विश्वास मधुकर मगर यांचा विद्युत पंप व जालींदर मगरसह अन्य दोन शेतकऱ्यांच्या मोटारीचे स्टार्टर चोरून नेले. हा प्रकार शुक्रवारी सकाळी उघडकीस आला. चोरीच्या घटनांमुळे शेतकऱ्यात भितीचे वातावरण पसरले आहे. विद्युत पंप चोरी प्रकरणी शेतकरी विश्वास मधुकर मगर (रा. सांगवी काटी) यांनी दिलेल्या फिर्यादीवरुन तामलवाडी पोलीस ठाण्यात अज्ञात चोरट्याविरूध्द चोरीचा गुन्हा दाखल करण्यात आला आहे.