गुरुजींच्या प्रयत्नातून शिष्यवृती परीक्षेत ‘तडवळा पॅटर्न’

नूर शेख

कसबे तडवळे (जि. उस्मानाबाद) : तालुक्यातील कसबे तडवळे येथील जिल्हा परिषद आदर्श प्राथमिक कन्याशाळेने मागील काही वर्षांत विशेषत: शिष्यवृत्ती परीक्षेत ‘तडवळा पॅटर्न’ निर्माण केला आहे. बाराही महिने चालणारी शाळा म्हणून या शाळेचा परिसरात नव्हे तर जिल्हाभरात नावलाैकिक झाला. मुख्याध्यापक रहेमान मकबूल सय्यद व सहकारी शिक्षकांची मेहनत, पालक अन् ग्रामस्थांच्या एकी यातून हे साध्य झाले. यापुढेही शाळेची घाेडदाैड अशीच कायम राहील, असा ठाम विश्वास मुख्याध्यापक सय्यद यांनी ‘लाेकमत’शी बाेलताना व्यक्त केला.

कसबे तडवळे येथील जिल्हा परिषद आदर्श प्राथमिक कन्याशाळेत कार्यरत असलेले मुख्याध्यापक रहेमान मकबूल सय्यद हे १ जुलै १९८९ रोजी शिक्षक म्हणून ताडगाव (ता. कळंब) येथे रुजू झाले. २०१६ मध्ये रहेमान सय्यद यांची आपल्या गावी कसबे तडवळे येथे बदली झाली. ग्रामीण भागातील मुलांतही गुणवत्ता असते. त्यांच्या गुणवत्तेला शिक्षकांच्या मार्गदर्शनाची जाेड मिळाली की, ही मुलेही मागे राहणार नाहीत, असा त्यांना विश्वास हाेता. यातूनच त्यांनी सहकारी गुरुजींना साेबत घेऊन नवाेदय, तसेच अन्य शालेय स्पर्धा परीक्षेच्या अनुषंगाने विद्यार्थ्यांची तयारी करून घेण्यास सुरुवात केली. सुटी असली तरी मुख्याध्यापक सय्यद यांच्यासह शिक्षक शाळेत येतात. त्यामुळे बाराही महिने चालणारी शाळा म्हणून या शाळेचा नावलाैकिक निर्माण झाला. आजघडीला शाळेतील १०८ मुली नवाेदयधारक, तर ५९ मुली शिष्यवृत्तीधारक बनल्या.

गुणवत्ता वाढीसाेबतच मुख्याध्यापक सय्यद यांनी शाळेत भाैतिक सुविधा वाढविण्यावरही भर दिला. लोकसहभाग व लोकवाट्यातून आज रोजीपर्यंत शाळेत १५ स्मार्ट टीव्ही, १५ सॅमसंग टॅब, एक इंटरॅक्टिवे बोर्ड, संपूर्ण शाळा परिसर सीसीटीव्ही कॅमेरा, ई लर्निंग, शिक्षक व पालकांच्या सहकार्याने तब्बल दीड लाख रुपयांचे सुसज्ज वाचनालय, पंधरा लाखांची नावीन्यपूर्ण प्रयोगशाळा, १४ वर्गखोल्या डिजिटल व शैक्षणिक साहित्याने सुसुज्ज, पंधरा लाखांची नावीन्यपूर्ण प्रयोगशाळा व शाळेतील विद्यार्थ्यांना पिण्यासाठी शुद्ध पाणी मिळावे यासाठी प्रतितास १०० लीटर क्षमतेचे वॉटर फिल्टर, सहा संगणक असलेली सुसज्ज संगणक प्रयोगशाळा, आकाश निरीक्षण दुर्बिणीयुक्त मेट्रोमनी क्लब, शाळेच्या पाठीमागील बाजूस सुंदर अशी परसबाग निर्मिती केली. त्यामुळे एकीकडे ग्रामीण भागातील जिल्हा परिषद शाळांचा पट कमी हाेत असताना तडवळ्याच्या शाळेचा पट पाचशेच्या आसपास पाेहाेचला आहे.