मंदिरात भाविकांची फसवणूक थांबवा

श्री तुळजाभवानी मंदिरामध्ये महाराष्ट्रासह विविध राज्यातून लाखोंच्या संख्येने भाविक देवी दर्शनासाठी येत असतात. सध्या कोरोना महामारीमुळे भाविकांना दर्शनासाठी मर्यादा असून, त्याचा गैरफायदा घेऊन काही बोगस व अनधिकृत लोक पुजारी वर्गाच्या वेशभूषेमध्ये भाविकांची मंदिर सुरक्षारक्षक कर्मचाऱ्यांसमक्ष फसवणूक करतात. हा प्रकार थांबविण्यासाठी श्री तुळजाभवानी मातेच्या हक्कदार पुजाऱ्यांसाठी अत्याधुनिक व सुरक्षिततेच्या दृष्टिकोनातून बायोमेट्रिक कार्ड तत्काळ मंदिर संस्थान मार्फत देण्यात यावे, तसेच मंदिर संस्थानमध्ये असणारे सीसीटीव्ही फुटेज पाहून, अनधिकृत एजंटवर योग्य ती प्रशासकीय कारवाई करावी. मंदिरामधील दर्शन मंडपामधील प्रत्येक मजल्यावर व मंदिर परिसरामध्ये टीव्ही लावून त्यावर बोगस व अनधिकृत व्यक्तीपासून सावध रहा, अशी सूचना द्यावी, तसेच फसवणूक करणाऱ्या व्यक्तीचे छायाचित्रे व त्यांच्याशी निगडित संपूर्ण माहिती प्रकाशित करण्यात यावी, असे या निवेदनात म्हटले आहे. यावर ॲड.धीरज जाधव, विजय भोसले, अर्जुन साळुंके, बाळासाहेब भोसले, अमर कंगले, सचिन जाधव यांच्या सह्या आहेत.