परंडा - खरीप हंगामासाठी उगवण क्षमतेसाठी विश्वसनीय असलेल्या नामांकित कंपनीच्या बियाणांचा परंडा तालुक्यात तुटवडा निर्माण झाला असून, खासापुरी चौकातील कृषी सेवा केंद्रावर गुरुवार बियाणे खरेदीसाठी शेतकऱ्यांची तोबा गर्दी होत असल्याने या कोरोना नियमांचा व सोशल डिस्टन्सिंगचा फज्जा उडत आहे.
अद्यापही तालुक्यात पेरणी योग्य पाऊस झाला नसला तरीही शेतकरी बी-बियाणांची आगाऊ बेगमी करून ठेवत आहेत तर काही शेतकऱ्यांची कोरड्या भुईवर खरीप पेरणीची लगबग सुरू आहे. तालुक्यात सर्वाधिक खरिपाचे क्षेत्र आहे. या पिकांच्या उत्पन्नावर शेतकऱ्यांचे अर्थचक्र अवलंबून आहे. या पिकांची देखभाल व योग्यवेळी खत व्यवस्थापन करण्यासाठी शेतकरी सर्वतोपरीने प्रयत्न करतात. मात्र, तालुक्यातील शेतकऱ्यांना नामांकित कंपन्यांच्या बियाणांची टंचाई भेडसावत आहे. त्यामुळे अनेक शेतकरी बाहेरील जिल्ह्यांतून बियाणे आणू लागले आहेत. गतवर्षी अनेक शेतकऱ्यांनी पेरणी करूनही बियाणे उगवले नव्हते. परिणामी शेतकऱ्यांना माेठा आर्थिक फटका बसला हाेता. भरपाई मिळावी, म्हणून पंचनामे करून प्रस्ताव कृषी कार्यालयाकडे सादर करण्यात आले हाेते. परंतु, त्याचाही फारसा फायदा झाला नाही. बहुतांश शेतकऱ्यांना अद्याप नुकसानभरपाई मिळालेली नाही. दरम्यान, अशा स्वरूपाचा धाेका यंदा हाेऊ नये, म्हणून शेतकरी नामांकित कंपन्यांच्या बियाण्याला पसंती देऊ लागले आहेत. त्यामुळे एखाद्या कृषी केंद्रांवर असे बियाणे उपलब्ध असल्यास लाेक शेतकरी गर्दी करत आहेत. अशावेळी फिजिकल डिस्टन्सिंगचे पालन हाेताना दिसत नाही.