परंडा : कोरोना रूग्णांच्या उपचारात कसलीही हयगय केलेली खपवून घेतली जाणार नाही. त्याकरिता शासनावर अवलंबून न राहता काय पाहिजे ते मला सांगा, मी स्वखर्चाने सर्व औषधे व साहित्य पुरवितो, असे आश्वासन आ. प्रा. डाॅ. तानाजी सावंत यांनी येथील प्रभारी वैद्यकीय अधिकारी डाॅ. अबरार पठाण यांना दिले.
आ. डाॅ. सावंत यांनी मंगळवारी वाशी, भूम, परंडा तालुक्यांचा धावता दाैरा केला. यावेळी त्यांनी येथील डाॅ. बाबासाहेब आंबेडकर वसतिगृहातील कोरोना केंद्र, उपजिल्हा रूग्णालयास भेट देऊन सुविधा व गैरसोयींची पाहणी केली. तसेच डाॅ. अबरार पठाण यांच्याशी चर्चा केली. कोरोना बाधितांवर उपचार करण्यासाठी मनुष्यबळ कमी पडत असून, डाॅक्टर व इतर मनुष्यबळही कमी असल्याचे सावंत यांच्या निदर्शनास आल्यावर सावंत म्हणाले, खाजगी क्षेत्रातून मनुष्यबळ मागवा. त्यांच्या पगारी आम्ही करू. औषधी मिळत नाहीत म्हणून गप्प न बसता अडचणी आम्हाला सांगा, त्या मी दूर करेन. तसेच खाजगी क्षेत्रातील मनुष्यबळ मागवा. त्यांना ‘भैरवनाथ’कडून दुप्पट पगारी देऊ, असेही सावंत यावेळी म्हणाले. ‘भगवान भरोसे’ रूग्ण सोडू नका, असा इशाराही त्यांनी दिला.
यानंतर त्यांनी तहसील कार्यालयात आढावा बैठक घेतली. यावेळी तहसीलदार अनिलकुमार होळकर, जि. प. उपाध्यक्ष धनंजय सावंत, कृषी व पशुधन विकास सभापती दत्ता साळुंके, गटविकास अधिकारी किशोर अंधारे, जिल्हा आरोग्य अधिकारी हनुमंत वडगावे, प्रा. तानाजी सावंत प्रतिष्ठानचे अध्यक्ष रामचंद्र घोगरे, शिवसेना जिल्हा प्रमुख गाैतम लटके, तालुका प्रमुख आण्णासाहेब जाधव, न. प. मुख्याधिकारी दिपक इंगोले, पोलीस निरिक्षक सुनिल गिड्डे आदी उपस्थित हाेते. दरम्यान, परंडा व शहरातील चित्र चिंताजनक असून, संचारबंदी व लाॅकडाऊन असतानाही सगळीकडे दुचाकी व चार चाकी वाहनातून नागरिक खुलेआम फिरताना दिसत आहेत. अशाने कोरोना कसा रोखला जाईल व चैन कशी ब्रेक होईल, असा सवाल करून संचालबंदीतील स्वैर संचाराबद्दल आ. सावंत यांनी चिंता व्यक्त केली.