उमरगा : येथील स्थानकात तीनवर्षीय चिमुकलीसह दाेन महिन्यांच्या स्त्री जातीच्या बाळास स्थानकात साेडून माता-पिता पसार झाले हाेते. या घटनेची माहिती मिळाल्यानंतर दाेन्ही मुलींना पाेलीस ठाण्यात नेऊन तपासाची चक्रे फिरविली असता, अवघ्या दाेन तासांत मुलीच्या आई-वडिलांचा शाेध घेतला. यानंतर दाेन्ही मुलींना त्यांच्या ताब्यात देण्यात आले. तिन्ही मुलीच झाल्याने पतीकडून छळ हाेत हाेता. या छळाला कंटाळूनच मुलींना स्थानकात साेडले, अशी कबुली मुलींच्या आईने पाेलिसांसमाेर दिली आहे. या प्रकरणी गुन्हाही दाखल झाला आहे.
उमरगा बस आगारात शनिवारी दुपारच्या वेळी एक शालीत गुंडाळलेले दीड ते दाेन महिन्यांचे स्त्री जातीचे बाळ व एक तीनवर्षीय मुलगी बेवारस स्थितीत दाळींब येथील सामाजिक कार्यकर्ते प्रकाश चव्हाण यांना दिसून आली. त्यांनी संबंधित चिमुकलीजवळ जाऊन विचारपूस करण्याचा प्रयत्न केला. परंतु, ती बाेलायला तयार नव्हती. यावेळी तेथे किल्लारी येथील दाेन तृतीयपंथी व्यक्ती आल्या. त्यांनी या दाेन्ही मुलींचा काहीकाळ सांभाळ केल्यानंतर प्रकाश चव्हाण यांनी आगार प्रशासनाला माहिती दिली. जवळपास दोन तास वाट पाहून सायंकाळी या मुलांना पोलिसांच्या ताब्यात देण्यात आले. पोलिसांनी तपासही सुरू केला. या दोन्ही मुलींचे फोटो सोशल मीडियावर टाकले. यावेळी दिवसभर अबोला धरलेल्या तीनवर्षीय मुलीने लमाणी भाषेत प्रकाश चव्हाण यांना बोलल्यानंतर व अणदूर या गावचा उल्लेख केला. गुप्तवार्ता विभागातील हेड कॉन्स्टेबल सुनीता राठोड यांनी नळदुर्ग येथील काही ग्रुपवर संबंधित मुलींचे फोटो टाकल्यानंतर काही क्षणातच अणदूर येथील पाटील तांडा येथील एका व्यक्तीने फाेन करून संबंधित मुलींच्या आई-वडिलांना मी ओळखताे, असे सांगितले. त्याने दिलेल्या माहितीच्या आधारे पाेलिसांनी मुलींच्या आई-वडिलांशी संपर्क करून तातडीने उमरगा पाेलीस ठाण्यात उपस्थित राहण्यास सांगितले. रात्री अकराच्या सुमारास संबंधित मुलींचे आई-वडील आल्यानंतर त्यांची कसून चौकशी केली. तपासाअंती दोन्ही मुली त्यांच्या ताब्यात दिल्या. हे शोध कार्य पोलीस अधीक्षक राज तिलक रौशन, संदीप पालवे अपर पोलीस अधीक्षक, अनुराधा उदमले उपविभागीय पोलीस अधिकारी यांच्या मार्गदर्शनाखाली पोलीस निरीक्षक मुकुंद अघाव, सहाय्यक पोलीस निरीक्षक सिद्धेश्वर गोरे, हेड कॉन्स्टेबल सुनीता राठोड, आम्रपाली पाटील, बबिता शिंदे यांनी पार पाडले.
चाैकट...
महिलेविरूद्ध गुन्हा नाेंद
मला तिन्ही मुलीच असल्याने नवऱ्याकडून नेहमी छळ होत होता. त्यामुळे या त्रासाला कंटाळून मी तिन्ही मुलींना सोडण्याच्या हेतूने उमरगा बसस्थाकात आले होते. तिन्ही मुलींना सोडले होते. परंतु, दोन नंबरची मुलगी मागे लागल्याने तिला सोबत घेत बाकी दोन्ही मुलींना सोडून निघाल्याचे महिलेने सांगितले. या प्रकरणी संबंधित महिलेवर गुन्हा दाखल करण्यात आला आहे. अधिक तपास सहाय्यक पोलीस निरीक्षक सिद्धेश्वर गोरे हे करीत आहेत.
चाैकट...
सामाजिक कार्यकर्ते प्रकाश पवार यांनी बसस्थानकात या दोन्ही मुलींचा संभाळ केला. त्याचबरोबर दोन तृतीयपंथी व्यक्तींनी संबंधित दीड ते दाेन महिन्याच्या बाळाचा सांभाळ केला. पोलीस ठाण्यात आणल्यावर महिला पोलीस कर्मचारी आम्रपाली पाटील व बबिता शिंदे यांनी या लेकरांची जी देखभाल केली, त्याचे सर्वत्र कौतुक होत आहे. सर्वात महत्त्वाचे म्हणजे या मुलांच्या आई-वडिलांचा शोध घेण्याची महत्त्वाची कामगिरी गुप्तवार्ता विभागाच्या हेड कॉन्स्टेबल सुनीता राठोड यांनी केली.