उस्मानाबाद/तेर : खासदार ओमराजे निंबाळकर यांना त्यांचे होमटाऊन राखण्यात पुन्हा एकदा यश आले आहे. ग्रुप ग्रामपंचायत असलेल्या गोवर्धनवाडी-थोडसरवाडी निवडणुकीत खासदार समर्थकांच्या पॅनेलचे ९ पैकी ६ सदस्य निवडून आले. त्यामुळे सत्तेचा सोपान आता खासदार समर्थकांकडेच असणार आहे. मात्र, असे असले तरी यावेळी भाजपचे आमदार राणा पाटील यांच्या समर्थकांनी कडवी झुंज देत ३ जागा निवडून आणल्या आहेत. गतवर्षी एकही जागा विरोधकांकडे नव्हती, ही बाब विशेष.
जागजी : खासदार ओमराजे यांचे आजोळ असलेल्या जागजीतही शिवसेना पुरस्कृत पॅनेलने बाजी मारत ग्रामपंचायत ताब्यात घेतली आहे. येथे १३ जागांसाठी झालेल्या निवडणुकीत शिवसेना पुरस्कृत पॅनेलने ८ जागा मिळवल्या तर त्यांच्या विरोधात उतरलेल्या जिल्हा परिषद सभापती दत्ता देवळकर यांच्या समर्थकांनी ५ जागांवर विजय मिळवला आहे. यातील एक जागा ही समसमान मते पडल्याने टॉसवर देवळकर समर्थकांच्या बाजूने आली.
पळसप : शिक्षक आमदार विक्रम काळे यांचे होमटाऊन असलेल्या पळसपमध्ये १३ जागांसाठी निवडणूक होती. मात्र, येथे राष्ट्रवादी-काँग्रेस-शिवसेनेने एकत्र येऊन यापूर्वीच ८ जागा त्यांच्या बाजूने बिनविरोध निवडून आणल्या. त्यामुळे उर्वरित ५ जागांसाठी मतदान झाले होते. त्यातही पुन्हा ४ जागा महाविकास आघाडीने आपल्याकडे खेचून आणल्या तर एका जागेवर अपक्षाची वर्णी लागली आहे.