लोकमत न्यूज नेटवर्क
तामलवाडी : तुळजापूर तालुक्यातील महत्वाच्या समजल्या जाणाऱ्या तामलवाडी ग्रामपंचायतीच्या ११ जागांसाठी झालेल्या निवडणुकीत महाविकास आघाडीने ८ जागा मिळवत सत्ता प्रस्थापित केली. तर ३ जागा एकता विकास पॅनेलला मिळाल्या.
तामलवाडी ग्रामपंचायत निवडणुकीत महाविकास आघाडी, एकता विकास पॅनेल व सर्वधर्म समभाव पॅनेलमध्ये लढत झाली. महाविकास आघाडीचे आप्पासाहेब रणसुरे हे बिनविरोध निवडून आल्याने उर्वरित १० जागांसाठी मतदान झाले. सोमवारी झालेल्या मतमोजणीमध्ये महाविकास आघाडीचे मंगल गवळी, सतीश माळी, हमीद पठाण, सुरेखा माळी, सुधीर पाटील, संजना गुरव, नुरबानू बेगडे तर एकता विकास पॅनेलचे बाजार समितीचे संचालक यशवंत लोंढे, शीतल गायकवाड, अनिता पाटील हे विजयी झाले. सर्वधर्म समभाव पॅनेलला एकही जागा मिळाली नाही. या निकालानंतर समर्थकांनी गुलाल उधळून आनंदोत्सव साजरा केला.
चौकट...
हमीद पठाण यांची हॅट्ट्रीक
येथील ग्रामपंचायतीमध्ये विजयी झालेले काॅंग्रेसचे हमीद पठाण यांनी निवडणुकीत हॅट्ट्रीक साधली. त्यांनी सलग दहा वर्षे उपसरपंच ते सदस्य पदावर काम केले. तसेच संजना गुरव याही सलग दुसऱ्यांदा विजयी झाल्या आहेत.
वडगावातही महाविकास आघाडी वरचढ
वडगाव (काटी) ग्रामपंचायत निवडणुकीत महाविकास आघाडीने ८ जागा जिंकल्या आहेत. यामध्ये महाविकास आघाडी, संघर्ष विकास पॅनेलमधे लढत झाली. मतमोजणीनंतर कमलबाई काळे, पूनम कोडगिरे, विद्यादेवी आगलावे, बिलकिस पाटील, सुरज पाटील, गजराबाई साखरे, प्रकाश डावरे, हर्षा चंगे तर संघर्ष विकास पॅनेलच्या नीलाबाई डोके या विजयी झाल्या आहेत.