नळदुर्ग :
येथील महामार्ग पोलिस केंद्राच्या वतीने अणदूर येथे ‘हायवे मृत्युंजय दूत’ योजना सुरु करण्यात आली असून, नुकतेच याचे उद्‌घाटन करण्यात आले. याअंतर्गत अपघातग्रस्तांना तातडीने कशा प्रकारे मदत करावी, याची प्रात्यक्षिके दाखविण्यात येत आहेत.
अप्पर पोलीस महासंचालक डॉ. भूषणकुमार उपाध्याय यांच्या संकल्पनेतून व पोलीस अधीक्षक संजय जाधव, पोलीस उप अधीक्षक प्रीतम यावलकर, पोलीस निरीक्षक राजन सस्ते यांच्या मार्गदर्शनाखाली " हायवे मृत्युंजय दूत" ही योजना राबवण्यात येत आहे. यावेळी वैद्यकीय अधिकारी डॉ. शेटे यांनी अपघातग्रस्तांना मदत करण्याचे प्रात्यक्षिक दाखविले. प्रास्ताविकात प्रभारी अधिकारी अधिकारी हनुमंत कवले यांनी हायवे मृत्युंजय दूत योजनेबद्दल माहिती दिली.
हायवे मृत्यूंजय दूत या योजनेअंतर्गत अपघात घडलेल्या ठिकाणाहून १०८ नंबर वरून कॉल करून ॲम्बुलन्स बोलावून घेणे,
जवळच्या रुग्णालयात दाखल करणे व त्याबाबतची माहिती अपघातग्रस्त व नातेवाईकांना सांगणे, यासोबतच जखमींना कसे उचलावे, काय करावे व काय करू नये, या बाबतची माहिती देण्यात आली. तसेच स्व.बाळासाहेब ठाकरे अपघात योजनेतून कोणत्याही रुग्णालयात ७२ तास मोफत उपचार मिळतो. जखमींना मदत केली व रुग्णालयात नेले तर पोलिस जास्त चौकशी करणार नाहीत, कोर्टचा ससेमिरा मागे लागणार नाही. अपघातग्रस्तांना मदत करणाऱ्यास प्रशस्तीपत्र व महामार्ग पोलिसांकडून आपणाला ओळखपत्र दिले जाईल, अशी माहिती यावेळी देण्यात आली.