उस्मानाबाद : कोरोना बाधित रुग्ण घटू लागल्याने मागील ७ जूनपासून बससेवा सुरू झाली आहे. मागील काही दिवसांपासून परराज्यात हैदराबाद व सुरत मार्गावरील धावणाऱ्या रातराणी बसेस सुरू झाल्या आहेत. मात्र, अद्यापही गाेवा व कर्नाटकात निर्बंध कडक असल्याने पणजी व बंगलोर जाणारी रातराणी बसेस बंद आहे. एप्रिल महिन्यात कोरोनाचे रुग्ण झपाट्याने वाढू लागल्याने राज्य परिवहन महामंडळाने बससेवा बंद केली होती. रुग्णांची संख्या घटू लागताच ७ जूनपासून पुन्हा बससेवा सुरू झाली. प्रवाशांचा प्रतिसाद पाहता रातराणी बसेसही सोडल्या जात आहेत. उस्मानाबाद-हैदराबाद दोन रातराणी बसेस धावू लागल्या आहेत. तर उस्मानाबाद-सुरत दोन बसेस सुरू करण्यात आल्या आहेत. कर्नाटक व गोवा या राज्यात परराज्यातून येणाऱ्या बसेसना प्रतिबंध असल्याने बंगलोर व पणजी मार्गावर धावणारी दोन्ही रातराणी बसेस बंद आहेत.
सध्या सुरम असलेल्या राज्यांतर्गत रातराणी
उस्मानाबाद-मुंबई
उस्मानाबाद-बोरीवली
उस्मानाबाद-भिवंडी
कोट...
उस्मानाबाद स्थानकातून एक औरंगाबाद मार्गे दुसरी नाशिक मार्गे सुरत बस सोडली आहे. हैदराबाद जाणाऱ्या दोन रातराणी बसेस सुरू आहेत. पणजी व बंगलोर या दोन बस बंद आहेत.
पांडुरंग पाटील, आगार प्रमुख, उस्मानाबाद
पणजी धावते कोल्हापूरपर्यंतच
उस्मानाबाद-पणजी मार्गावर धावणारी रातराणी बसेस गोवा राज्यात परराज्यातील बसेसला अद्याप परवानगी नसल्याने बंद आहे. त्यामुळे उस्मानाबाद येथून ही बस कोल्हापूरपर्यंत सोडली जात आहे. मागील आठवड्यात कोल्हापुरात आलेल्या पुरामुळे बस बंंद होती.
उस्मानाबाद येथून बंगलोरला जाण्यासाठी रातराणी बस धावते. मात्र कोरोना संसर्गापासून ही बसही बंदच आहे. सध्या उस्मानाबाद-सुरत धावणाऱ्या दोन बसेस सुरु असून, प्रतिकिलोमीटर १७ ते १८ रुपये उत्पन्न मिळत असून बसेसचा डिझेल खर्च निघत आहे. येत्या काही दिवसात प्रवाशांना प्रतिसाद वाढल्यानंतर या बसेसही पूर्वपदावर येतील, असे एसटीकडून सांगण्यात आले.