काक्रंबा : तुळजापूर तालुक्यातील काक्रंबा येथे कोरोना रुग्णांच्या संख्येत मोठ्या प्रमाणात वाढ होत आहे. या पार्श्वभूमीवर तहसीलदार सौदागर तांदळे यांनी सोमवारी जि. प. शाळेत बैठक घेऊन विविध उपाययोजना राबवित आठ दिवसांत कोरोनाची साखळी तुटली पाहिजे, याकामी प्रत्येकाने सहकार्य करावे, अन्यथा त्यांच्यावर थेट गुन्हे दाखल केले जातील, असा इशारा दिला.
काक्रंबा येथे गेल्या महिनाभरात कोरोनाचे तब्बल १४९ रुग्ण आढळून आले. यात तिघा बालकांचाही समावेश असून, चौघांचा मृत्यू झाला आहे. सध्या तुळजापूर येथे ४९ जण उपचार घेत आहेत. ‘लोकमत’ने गावातील ही विदारक स्थिती रविवारी वृत्ताच्या माध्यमातून मांडल्यानंतर याची गांभीर्याने दखल घेत तहसीलदार सौदागर तांदळे यांनी सोमवारी येथील जि. प. शाळेत बैठक घेतली. यावेळी ग्रामपंचायत प्रशासनासह गावकऱ्यांना कोरोना संसर्गाची चेन रोखण्यासाठी सर्वांनी मदत करण्याचे आवाहन त्यांनी केले. गावात ग्राम सुरक्षा समितीचे गठण करण्यात आले असून, बाधित रुग्ण असलेल्या परिसराला बॅरिगेटींग करून गावातील रस्तेही सील करण्यात आल्याचे सांगण्यात आले. मंदिर व मशिदीवरील लाऊडस्पीकरद्वारे कोरोनासंबंधी जनजागृती करावी. कोरोनाची साखळी तोडण्यासाठी कुठलीही मदत लागली तर मला फोन करा, असेही तांदळे यावेळी म्हणाले.
बैठकीस डॉ. राजश्री भिसे, ग्रामसेवक चैतन्य गोरे, उपसरपंच अरविंद कानडे, बालाजी बंडगर, तलाठी बाळासाहेब पवार, मुख्याध्यापक बाबूराव चव्हाण, ग्रा. पं. सदस्य अनिल बंडगर, उमेश पांडागळे, उमेश खांडेकर, पोलीस पाटील प्रमोद खताळ, चेतन बंडगर, समाधान पाटील, शहाजी देवगुंडे, विनोद साबळे, फिरोज अन्सारी, अहमद अन्सारी, उमेश सुर्वे, आरोग्य विभागाचे सतीश कोळगे, आनंद कुलकर्णी, शीतल वाडकर आदी उपस्थित होते. दरम्यान, तुळजापूरचे गटविकास अधिकारी प्रशांत सिंह मरोड व तालुका आरोग्य अधिकारी डॉ. सुहास पवार यांनीही दुपारी येथील प्राथमिक आरोग्य उपकेंद्रास भेट देऊन परिस्थितीचा आढावा घेऊन वाढत चाललेली रुग्ण संख्या कमी करण्यासंदर्भात सूचना केल्या.
चौकट...............
बैठकांवर बैठका, मात्र कार्यवाही नाही
काक्रंबा येथे मार्चपासून कोरना रुग्णांची संख्या वाढत होती. त्या अनुषंगाने ३ एप्रिल रोजी सलगरा प्राथमिक आरोग्य केंद्रातील आरोग्य अधिकारी डॉ. अनिल वाघमारे यांनी बैठक घेऊन सर्वांना कोरोना संसर्ग गावात वाढू नये यासाठी उपाययोजना सांगितल्या होत्या. मात्र, ती बैठक फोटोसेशनपुरतीच मर्यादित ठरली. त्यानंतर शनिवारी गावातील सर्व लोकप्रतिनिधी, आरोग्य कर्मचारी, आशा कार्यकर्ती, शिक्षक, अंगणवाडी कर्मचाऱ्यांची बैठक घेण्यात आली. त्यामध्ये कोरोनाची साखळी रोखण्यासंदर्भात चर्चा करण्यात आली. मात्र, कुठलीच कार्यवाही झाली नाही. त्यामुळे तहसीलदार यांनी स्वतः बैठक घेऊन उपाययोजनासंदर्भात आदेश दिले.