उमरगा : तालुक्यात वीज वितरण कंपनीचे कृषी, औद्योगिक, वाणिज्य, घरगुती या वर्गवारीतील वीज ग्राहक आहेत. या वीज ग्राहकांना महावितरणकडून महिनाभर वीजपुरवठा केला जातो. त्यापोटी वीज बिल देण्यात येते. मात्र, या बिलापासून मुक्तता मिळावी, यासाठी ग्रामीण भागात बहुसंख्य वीजग्राहक शेजाऱ्यांकडून वीजपुरवठा घेतात. तसेच घरगुती वापरासाठी घेतलेला विद्युतपुरवठा बऱ्याच वेळा दुकानात वाणिज्य कारणासाठी वापरला जातो. हा गुन्हा आहे. शिवाय, शेजाऱ्यांकडून वीजपुरवठा घेणे हे देखील अनधिकृत असून, असा प्रकार आढळल्यास वीज ग्राहक व संबंधितावर वीज वितरण कंपनीच्या वतीने कारवाई केली जाऊ शकते. त्यामुळे वीज ग्राहकांनी आपला वीजपुरवठा शेजाऱ्याला न देता अधिकृतपणे वीज जोडणी घेण्यासाठी संबंधितास प्रवृत्त करावे, असे आवाहन वीज वितरण कंपनीच्या वतीने करण्यात आले आहे.
महावितरणकडून वर्षभरात झालेली कारवाई
प्रकरणे युनिट चोरी दंड वसुली
शहर निरंक निरंक निरंक
ग्रामीण २१ १.२६ लक्ष ०.३९ लक्ष
एकूण २१ १.२६ लक्ष ०.३९ लक्ष
कायदा काय सांगतो ?
एखाद्या वीज ग्राहकाने शेजाऱ्याला अनधिकृतपणे वीज जोडणी दिल्यास, वीज वितरण कंपनीच्या २००३ मधील कायद्यानुसार १२६ कलमांतर्गत मीटरमध्ये छेडछाड करणे, अनधिकृत वीज जोडणी घेणे, शेजाऱ्याला वीज देणे असे प्रकार आढळून आल्यास संबंधित वीज ग्राहक व इतरांवर गुन्हा दाखल होऊ शकतो, असे महावितरणचा कायदा सांगतो.
■चोरी कळवा, दंडातील १० टक्के रक्कम बक्षीस मिळवा
वीज वितरण कंपनीचे मोठ्या संख्येने वीज ग्राहक आहेत. या ग्राहकांकडे मोठ्या प्रमाणात थकबाकी आहे. या थकबाकीमुळे अडचणीत आलेल्या महावितरण कंपनीला अनधिकृत वीजचोरी, वीज गळती यासह अनेक अडचणींना सामोरे जावे लागत आहे. त्यामुळे वीज वितरण कंपनीच्या वतीने अनधिकृत वीज चोरीला आळा घालण्यासाठी ‘चोरी कळवा दंडातील १० टक्के रक्कम बक्षीस मिळवा’ हा उपक्रम सुरू करण्यात आला आहे.
शेजाऱ्यांकडून अथवा घराची वीज दुकानासाठी जात असेल, तर तोही गुन्हा ठरतो. संबंधित ग्राहकांवर विद्युत कायदा २००३ नुसार कारवाई करण्यात येत आहे. यात थकबाकीदार ग्राहकाने शेजाऱ्यांकडून विजेचा वापर केल्यास व शेजाऱ्याने परस्पर वीजपुरवठा केल्यास दोघांवरही कलम १२६ नुसार कारवाई करण्यात येते. पोलीस ठाण्यात गुन्हा नोंद होऊन संबंधितांना अटकही होऊ शकते. या वीज चोरीच्या प्रकरणात गुन्हा सिद्ध झाल्यास तीन वर्षांपर्यंत कारावासाची शिक्षा होऊ शकते.
- आर. एन. शेंडेकर, उपकार्यकारी अभियंता, उमरगा