ग्रामीण भागातील वाढते संक्रमण लक्षात घेऊन मोठया गावांत कोविड केअर सेंटर सुरु करण्याचे आवाहन आपण २४ एप्रिल रोजीच केले होते. शिवाय, २६ एप्रिल रोजी झालेल्या पालकमंत्र्यांच्या बैठकीत तसा प्रस्तावही मांडला होता. याअनुषंगाने जिल्हा प्रशासनाकडून आयसोलेशन सेंटरला परवानगी देण्यात आली. जिल्ह्यात १८ गावांमध्ये असे अलगीकरण केंद्र सुरु करण्यात आले आहेत. दरम्यान, रविवारी केंद्र सरकारच्या आरोग्य मंत्रालयाने परिपत्रकाद्वारे ग्रामीण भागात कोविड केअर सेंटर सुरु करण्यावर भर देण्याचे सूचित केले आहे. प्रत्येक केंद्रात अनिवार्य सुविधा, आरोग्य कर्मचारी व इतर बाबी सुस्पष्ट केल्या आहेत. यामुळे सध्या चालू असलेल्या अलगीकरण केंद्रांना अधिकच्या सुविधा उपलब्ध करून ग्रामीण कोविड केअर सेंटरमध्ये रुपांतरित करणे सोपे होणार आहे.
तेरमध्ये सध्या ७० खाटांचे अलगीकरण केंद्र कार्यान्वित आहे. लोकसहभाग व प्रशासनाच्या सहकार्याने सुरु असलेले हे केंद्र कोविड केअर सेंटर मध्ये रुपांतरीत करण्याची मागणी जिल्हाधिकाऱ्यांकडे करण्यात आली आहे. आता प्रत्येक जिल्हा परिषद गटनिहाय एक कोविड केअर सेंटर सुरु करण्याची गरज आहे. नवीन निकषाप्रमाणे कोविड केअर सेंटरसाठी किमान २ खाटांना ऑक्सिजन सुविधा, पूर्णवेळ ऑक्सिजनयुक्त रुग्णवाहिकेची सेवा, रॅपिड टेस्टची सोय, संशयित रुग्णांसाठी वेगळा कक्ष व पर्याप्त औषधांचा साठा उपलब्ध करणे अनिवार्य आहे. या केंद्रांमुळे संक्रमण रोखण्यास मदत होणार असल्याने जिल्हा परिषद सदस्यांसह लोकप्रतिनिधींनी पुढाकार घेण्याचे आवाहन आ. राणाजगजितसिंह पाटील यांनी केले आहे.