आज १५ केंद्रांवर मिळणार कोव्हॅक्सिनचा डोस

उस्मानाबाद : कोरोना बाधितांची संख्या कमी झाली असली तरी अद्याप कोरोना संसर्गाचा धोका अद्याप टळलेला नाही. त्यामुळे नागरिक कोरोना प्रतिबंधात्मक लस घेण्यासाठी पुढे येत आहेत. आरोग्य विभागाने १५ केंद्रावर कोव्हॅक्सिनचा डोस उपलब्ध करून दिला असून, यापैकी १२ केंद्रांवर १८ ते ४४ वयोगटास तर ३ केंद्रावर ४५ वर्षांपुढील नागरिकांना लस मिळणार आहे. जून महिन्यापासून कोरोना बाधित रुग्णांची संख्या कमी होऊ लागली आहे. मात्र, कोराना संसर्गाचा धोका अद्याप टळलेला नाही. येत्या काही महिन्यात कोरोनाची तिसरी लाट येण्याची शक्यता तज्ज्ञांनी वर्तविली आहे. सुरक्षेच्या दृष्टीने सजग नागरिक कोविड प्रतिबंधात्मक लस घेण्यास पुढे येत आहेत. आरोग्य विभागाच्या वतीने ग्रामीण तसेच शहरी भागात वेगाने लसीकरण मोहीम राबविली जात आहे. शनिवारी जिल्ह्यातील १५ केंद्रांवर कोव्हॅक्सिन लस उपलब्ध करून देण्यात आली आहे. १८ ते ४४ वयोगटातील नागरिकांना सहा ग्रामीण रुग्णालये, चार उपजिल्हा रुग्णालये, जिल्हा रुग्णालय, शासकीय आयुर्वेदिक महाविद्यालय या ठिकाणी लस देण्यात येणार आहे. तर उस्मानाबाद येथील वैराग रोड व राम नगर भागातील नागरी प्राथमिक आरोग्य केंद्रावर व पोलीस रुग्णालयात ४५ वर्षांपुढील नागरिक, आरोग्य कर्मचारी, फ्रंटलाईन वर्कर यांना लस दिली जाणार आहे. या तीन केंद्रावर ६० वर्षांपुढील नागरिक, दिव्यांग, दुर्धर आजार असलेल्या नागरिकांना प्राधान्य असणार आहे.