उस्मानाबाद : कोरोना महामारीच्या काळात डॉक्टर व आरोग्य कर्मचारी अग्रभागी येऊन दिवस-रात्र सेवा बजावत आहेत. कोरोना काळात वाढलेला कामाचा व्याप, त्यामुळे होणारी धावपळ या कारणामुळे डॉक्टरांचे वजन घटले असल्याचे समोर आले आहे. अनेक डॉक्टर आरोग्य सदृढ ठेवण्यासाठी सकस आहार व नियमित व्यायामावर भर देत आहेत. जिल्ह्यात गतवर्षी मार्च महिन्यापासून राज्यात कोरोना विषाणू संसर्गाने शिरकाव केला. एप्रिल महिन्याच्या पहिल्या आठवड्यापासून रुग्ण आढळून येण्यास सुरुवात झाली. उपलब्ध डॉक्टर व आरोग्य कर्मचाऱ्यांसाठी हा आजार नवाच होता. आजारावर
औषध तसेच प्रारंभी लसही नव्हती. त्याचबरोबर आरोग्याच्या दृष्टीने लागणारी साधन सामग्रीही अपुरीच
होती. शिवाय, आरोग्य विभागात डॉक्टरांचे रिक्त पदेही होती. अशा स्थितीतही डॉक्टर व आरोग्य कर्मचाऱ्यांनी रुग्णसेवेला प्राधान्य देत कोरोनाशी दोन हात देत आहेत. वेळप्रसंगी डॉक्टरांना १२ ते २४ तासही ड्युटी करावी लागत आहे. या काळात कामाचा वाढलेला व्याप, त्यामुळे होणारी धावपळ, यामुळे डॉक्टरांचे आरोग्याकडेही दुर्लक्ष होऊ लागले. परिणामी, अनेक डॉक्टरांचे ५ ते १० किलो वजन घटले आहे. दरम्यान, सध्या डॉक्टर आरोग्य सदृढ ठेवण्यासाठी सकस आहार, योगासने, नियमित व्यायाम करण्यावर भर देत आहेत.
पॉईंटर्स
जिल्हा रुग्णालय - १
डॉक्टर्सची संख्या - ३३
आरोग्य कर्मचारी - २०००
प्रतिक्रिया
कोरोना काळात कामाचा अधिक ताण वाढला. कोविड कक्षात काम करीत असताना दोन वेळेस राऊंड घेणे, मॉनिटर करणे, ऑक्सिजनचा पुरवठा होतो का नाही, याची पहाणी करणे, तसेच क्रिटिकल रुग्ण रेफर करणे अशी नियमित १२ तासांची ड्युटी आहे. त्याचबरोबर विविध बैठकांना उपस्थित राहणे. त्यामुळे आरोग्याकडे दुर्लक्षही झाले होते. १४ महिन्यांपूर्वी माझे ७८ किलो वजन होते. सध्या ७४ किलो वजन झाले आहे. आरोग्य सदृढ ठेवण्यासाठी अर्धा तास योगा व विपश्यना करीत आहे.
डॉ. रवींद्र पापडे, कान-नाक-घसा तज्ज्ञ, उस्मानाबाद
ऑक्टोबर २०२० मध्ये कोविड रुग्णालयात सेवेवर रुजू झालो. त्यावेळी माझे वजन ९० किलो होते. कामामध्ये जेवणाकडेही दुर्लक्ष झाले.
त्यामुळे आता वजन ८० किलो इतके झाले आहे. नियमित व्यायाम करूनही वजन कमी होत नव्हते. कोविडच्या कामामुळे वजन कमी झाले आहे. कोरोना काळात रुग्ण सेवा करता येत आहे. त्याचबरोबर वजनही कमी झाले आहे. वजन कमी होणे माझ्यासाठी सकारात्मक बाब आहे. सध्या निरोगी आरोग्यासाठी व्यायाम नियमित करीत आहे. डॉ. इस्माईल मुल्ला, कोविड नोडल अधिकारी, उस्मानाबाद
मागील तीन चार महिन्यांपूर्वी ऑक्सिजनचा नियमित तुटवडा निर्माण होत होता. या काळात ऑक्सिजनचा वेळेवर पुरवठा करणे, ऑक्सिजनचा किती दाबाने पुरवठा होतोय, याची जबाबदारी असल्यामुळे तारेवरची कसरत होती. त्यामुळे जेवणाच्या वेळेत बदल होत राहिला. ६० किलो वजन ६७ इतके झाले आहे. सध्या रुग्णालयात लिक्विड ऑक्सिजन टँक उभारण्यात आल्याने कामाचा ताण कमी झाला आहे. ताण कमी करण्यासाठी सकाळी नियमित धावणे व योगा करतो.
डॉ. सतीश आदटराव, उस्मानाबाद.
सकस व पौष्टिक आहार
कामाच्या व्यापामुळे ताणतणाव वाढतो. या काळात शारीरिक व मानसिक आरोग्य सदृढ ठेवण्यासाठी डॉक्टर सकाळी धावणे, योगा, विपश्यना करून ताण घालवत आहेत. त्याचबरोबर आहाराकडेही विशेष लक्ष देत आहेत. सकाळी नाष्टा, दुपारी व रात्री जेवण करीत आहेत. फळे व भाज्या तसेच प्रॉटिनयुक्त आहार घेण्यावर सध्या डॉक्टरांचा कल आहे. वजन वाढू नये यासाठी तळलेले पदार्थ खाण्याचे टाळत आहेत.