कळंब (जि. उस्मानाबाद) - नातेवाईकाच्या तेराव्याला जात असलेल्या दुचाकीवरील ४५ वर्षीय शिक्षक व त्यांच्या पत्नीचा कारने उडवल्याने दुर्देवी मृत्यू झाला आहे. शनिवारी दुपारी बाराच्या सुमारास खामगाव-पंढरपूर राष्ट्रीय महामार्गावरील आंदोरा गावालगत ही घटना घडली आहे.
कळंब तालुक्यातील जवळा खुर्द येथील सुधीर विश्वनाथ लोमटे (वय ४५) हे गावातीलच जिल्हा परिषदेच्या शाळेत शिक्षक म्हणून कार्यरत होते. शनिवारी दुपारी बाराच्या सुमारास आपल्या दुचाकी (क्र. एमएच. २५-डब्ल्यू.१०९४) वरून पत्नी अनितासह ते कन्हेरवाडी येथे एका नातेवाईकाच्या तेराव्याच्या कार्यक्रमास उपस्थित राहण्यासाठी चालले होते.
त्यांची दुचाकी खामगाव-पंढरपूर राष्ट्रीय महामार्गावरील आंदोरा गावालगतच्या पुलाजवळ आली असता समोरून येणा-या (क्र. एमएच.१४-एचडी.०५६१) या कारने उडवले. या भीषण अपघातामध्ये सुधीर लोमटे यांचा जागीच मृत्यू झाला तर पत्नी अनिता यांना गंभीर जखमी अवस्थेत कळंब येथील उपजिल्हा रुग्णालयात दाखल केले असता त्यांचाही मृत्यू झाला.
सुधीर लोमटे हे एक उपक्रमशील शिक्षक म्हणून ओळखले जात होते. त्यांच्या या अपघाती मृत्यूचे वृत्त समजताच मुळ गाव जवळा खुर्दसह वास्तव्यास असलेल्या कळंब शहरात व शैक्षणिक वर्तुळात हळहळ केली जात आहे.
त्यांच्या पश्चात आई, वडील, दोन भाऊ, एक मुलगा व एक मुलगी असा परिवार आहे. घटनास्थळी कळंब पोलिस दाखल होत पुढील तपास करत होते.
चौकट...
आंदोरा येथील दुभाजकाचा विषय पुन्हा ऐरणीवर
खामगाव पंढरपूर महामार्गाचे काम करतांना संबंधित ठेकेदार कंपनीने वर्दळ नसलेल्या मस्सा ते मनुष्यबळ या भागात दुभाजक केले आहेत. मात्र स्थानिक व हायवेवरील वाहतुकीचे ‘कंजेक्शन’ होत असलेल्या आंदोरा गाव हद्दीत असे दुभाजक, रुंदीकरण न करता काम ओढले आहे. यामुळे असे अपघात यापूर्वी ही झाले आहेत. पुढील धोका कमी करण्यासाठी आता तरी कंपनीने येथे दुभाजक व रुंदीकरण करावे, अशी मागणी ग्रापं सदस्य पी. जी. नाना तांबारे यांनी केली आहे.