उस्मानाबाद : मागील काही दिवसांपासून कोरोनाबाधित रुग्णांची संख्या आटोक्यात आली आहे. मात्र, कोरोना संसर्गाचा धोका अद्याप टळलेला नाही. त्यामुळे कोरोनापासून बचाव करण्यासाठी सजग नागरिक कोरोना प्रतिबंधात्मक लस घेण्यासाठी पुढे येत आहेत. आरोग्य विभागाच्या वतीने सोमवारी १२ केंद्रांवर कोव्हॅक्सिन तर ८ केंद्रांवर कोविशिल्ड लस उपलब्ध करून दिली आहे. या केंद्रांवर १८ वर्षांपुढील नागरिकांना पहिला व दुसरा डोस घेता येईल.
तीन महिन्यांपासून जिल्ह्यात कोरोना रुग्णांची संख्या घटू लागली आहे. मात्र, काेरोना विषाणू संसर्गाचा धोका अद्याप पूर्णत: टळलेला नाही, शिवाय येत्या काही महिन्यांत कोरोनाची तिसरी लाट येण्याचे भाकीत तज्ज्ञांनी वर्तविले आहे. त्यामुळे कोरोना संसर्गापासून बचाव करण्यासाठी मास्क, फिजिकल डिस्टन्स, हात स्वच्छ धुणे या त्रिसूत्रीचे पालन करण्याचे आवाहन आरोग्य विभागाकडून केले जात आहे. सोबतच ग्रामीण, तसेच शहरी भागात कोरोना प्रतिबंधात्मक लसीकरण मोहीम राबविण्यात येत आहे. सोमवारी १२ केंद्रांवर कोव्हॅक्सिन ८ केंद्रांवर कोविशिल्ड लस उपलब्ध करून देण्यात आली आहे. या केंद्रांवर १८ वर्षांपुढील नागरिक, ज्येष्ठ नागरिक, दुर्धर आजारी व्यक्ती, दिव्यांग यांना प्राधान्याने लस घेता येईल. ४५ वर्षांपुढील नागरिकांना ‘ऑन द स्पॉट’ लस मिळणार आहे.
या ठिकाणी मिळेल कोव्हॅक्सिन
लोहारा, सास्तूर, मुरुम, वाशी, भूम, तेर ग्रामीण रुग्णालय, तुळजापूर, उमरगा, परंडा, कळंब उपजिल्हा रुग्णालय, उस्मानाबाद येथील शासकीय आयुर्वेदिक महाविद्याल, जिल्हा रुग्णालय या ठिकाणी कोव्हॅक्सिनचा पहिला व दुसरा डोस मिळेल. पहिला डोस घेऊन २८ दिवस पूर्ण झाले आहेत. अशा व्यक्तींनीच दुसरा डोस घ्यावा, असे आवाहन करण्यात आले आहे.
येथे मिळणार काेविशिल्ड
उमरगा येथील जिजामाता प्राथमिक विद्यामंदिर, जिल्हा परिषद प्रशाला, कळंब येथील फुले, आंबेडकर वाचनालय, परंडा येथील जिजामाता प्राथमिक विद्यामंदिर, लोहारा येथील भारतमाता मंदिर, वाशी येथील शिवशक्तीनगर परिसरातील जि.प.प्रा. शाळा, मुरुम येथील नूतन प्राथमिक शाळा, भूम येथील रवींद्र हायस्कूल या केंद्रावर कोविशिल्ड लस मिळेल. पहिला डोस घेऊन ८४ दिवस पूर्ण झाले आहेत. त्यांनी दुसरा डोस मिळेल.