लोहारा : तालुक्यात कोरोना संसर्ग वाढू नये, यासाठी तालुकास्तरापासून गावस्तरापर्यंत प्रशासनाकडून विविध उपाययोजना राबविण्यात आल्या. यामुळेच कोरोनाच्या रुग्ण संख्येत आता कमालीची घट झाली असून, सद्यस्थितीत गावातून कोरोनाला हद्दपार करण्यात १७ गावांना यश आले आहे. याशिवाय २६ गावात बोटावर मोजण्याइतपत रुग्णसंख्या दिसून येत आहे.
कोरोनाच्या पहिल्या लाटेची सुरुवात तालुक्यातील धानुरी गावातून झाली होती. त्यामुळे ग्रामस्थांसह प्रशासनाचीही झोप उडाली. यानंतर हळूहळू सर्वच गावात कमी-अधिक प्रमाणात कोरोनाचे रुग्ण आढळून येत होते. पहिल्या लाटेत रुग्ण संख्या आणि मृत्यूचे प्रमाणही कमीच होते. परंतु, नागरिकांत मोठी भीती होती. हळूहळू या लाटेचा प्रभाव कमी होऊ लागल्याने शासनाने लॉकडाऊन उठवून बाजारपेठ, मंदिरे खुली केली. यामुळे नागरिकही बिनधास्त राहिले. परंतु, मार्च महिन्यात दुसऱ्या लाटेने तालुक्यात प्रवेश केला. पहिल्या लाटेपेक्षा दुसऱ्या लाटेतील रुग्णांची संख्या मोठी होती. शिवाय, मृत्यूचे प्रमाणही वाढले होते.
कोरोनाच्या दुसऱ्या लाटेत लोहारा, माकणी, जेवळी, कानेगाव, अचलेर, आष्टाकासार, नागूर, सास्तूर, एकोंडी (लो.), हिप्परगा, खेड, धानुरीसह अनेक गावे कोरोनाचे हॉटस्पॉट बनले. यामुळे नागरिकांत प्रचंड भीती निर्माण झाली होती. अशा परिस्थितीत तालुका आरोग्य विभाग, लोहारा ग्रामीण रुग्णालय, सास्तूर येथील स्पर्श ग्रामीण रुग्णालयाने अत्यंत प्रभावीपणे यंत्रणा राबवत कोरोनाचा संसर्ग रोखण्यासाठी शर्थीचे प्रयत्न सुरू केले. पाहता पाहता आज तालुक्यातील १७ गावातून कोरोना पूर्णपणे हद्दपार झाला असून, २६ गावात बोटावर मोजण्याइतके रुग्ण आहेत. त्यामुळे ही गावेही लवकरच कोराेनामुक्त होतील, अशी आशा व्यक्त होत आहे. सध्या लोहारा शहरासह एकोंडी (लो.), कानेगाव, धानुरी, जेवळी, सास्तूर व करवंजी या गावात दोन आकडी कोरोना रुग्ण संख्या असून, तालुक्यात सर्वाधिक ७९ कोरोना रुग्ण एकोंडी (लो.) गावात आहेत. चौकट..........
ही गावे झाली कोरोनामुक्त
लोहारा तालुक्यातील बेलवाडी, बेडकाळ, काटे चिंचोली, रेबे चिंचोली, दस्तापूर, फणेपूर, होळी, करजगाव, कास्ती (खुर्द), लोहारा (खुर्द), मोघा (बु.), मोघा (खुर्द), कोंडजीगड, राजेगाव, रुद्रवाडी, शिवकरवाडी आणि उंडरगाव ही १७ गावे सध्या कोरोनामुक्त आहेत.
६३ जणांचा मृत्यू
लोहारा तालुक्यात आतापर्यंत ३ हजार ४०० कोरोना रुग्ण सापडले असून, यात शहरातील ५४९, तर ग्रामीण भागातील २ हजार ८५१ रुग्णांचा समावेश आहे. यातील शहरात १६, तर ग्रामीण भागात ४७ जणांचा या आजाराने मृत्यू झाला. सध्या शहरात २७, तर ग्रामीण भागात २४२ ॲक्टिव्ह रुग्ण आहेत. तालुक्याचा मृत्यू दर हा १.८५ टक्के असून, रुग्ण बरे होण्याचे प्रमाण ९०.२३ टक्के आहे.
यांचे योगदान मोलाचे
कोरोनाचा संसर्ग कमी करण्याच्या दृष्टीने तहसीलदार संतोष रुईकर, गटविकास अधिकारी सोपान अकेले, तालुका आरोग्य अधिकारी डॉ. अशोक कटारे, लोहारा ग्रामीण रुग्णालयाचे अधीक्षक डॉ. गोविंद साठे, सास्तूर येथील स्पर्श ग्रामीण रुग्णालयाचे समन्वयक रमाकांत जोशी यांच्यासह प्राथमिक आरोग्य केंद्र, उपकेंद्र, कोविड सेंटरमधील डॉक्टर, नर्स, आरोग्यसेवक, सेविका, आशा कार्यकर्ती, अंगणवाडी कार्यकर्ती, आरोग्य कर्मचारी, वाहन चालक आदींनी वेळोवेळी घेतलेली मेहनत व लोकप्रतिनिधींचा पाठपुरावा यामुळे कोरोना संसर्ग रोखण्यास मदत मिळत आहे.
कोट.......
नियमांचे काटेकोरपणे पालन, टेस्टिंग आणि लसीकरण या त्रिसूत्रीमुळे लोहारा तालुक्यातील एकूण १७ गावे आज कोरोनामुक्त झाली आहेत. उर्वरित गावेही कोरोनामुक्त होण्यासाठी प्रशासन प्रयत्नशील आहेत. सर्वांनी नियम पाळूनच दैनंदिन व्यवहार करावेत, जास्तीत जास्त नागरिकांनी तपासणी करून घ्यावी तसेच लस घ्यावी व तालुक्याला कोरोनामुक्त करण्यास मदत करावी.
- डॉ. अशोक कटारे, तालुका आरोग्य अधिकारी