धानुरी : लोहारा तालुक्यातील धानुरी येथे १५ दिवसापूर्वीच सात घरे फोडल्याची घटना घडली होती. पाठोपाठ पुन्हा मंगळवारी पहाटेच्या सुमारास चार घरे व अंगणवाडीत चोरट्यांनी हात साफ केला. यावेळी चोरट्यांनी सोन्याचे दागिने, रोख रकमेसह एक दुचाकीही चोरून नेली. या घटनेमुळे ग्रामस्थांमध्ये भीतीचे वातावरण निर्माण झाले आहे. मंगळवारी पहाटेच्या सुमारास चोरट्यांनी गावातील जयहिंद पाटील यांचे घर फोडून कपाटातील लॉकरमध्ये ठेवलेले साडेतीन तोळे सोन्याचे दागिने लंपास केले. तसेच गणेश ज्ञानोबा यादव हे कुटुंबीयांसह बाहेरगावी गेले असल्याने घरात कुणीही नसल्याची संधी साधून चोरट्यांनी त्यांच्या घराचे कुलूप तोडून आत प्रवेश मिळविला. या ठिकाणाहून कपाटात ठेवलेले अडीच तोळे सोन्याचे दागिने व रोख ५ हजार रुपये लंपास केले. गावातीलच अंगणवाडी क्रमांक ३ चे कुलूप तोडून चोरट्यांनी येथूनही अंदाजे २० हजार रुपये किमतीचा एलईडी टीव्ही चोरून नेला. मेघराज पाटील यांनी आठ दिवसापूर्वीच दुचाकी विकत घेतली होती. नेहमीप्रमाणे त्यांनी ती दुचाकी घरासमोर लावून झोपी गेले होते. चोरट्यांनी जाता जाता ही दुचाकीही लंपास केली.
या घटनेची माहिती नागरिकांनी व पोलीस पाटलांनी लोहारा पोलिसांना दिल्यानंतर पोलीस निरीक्षक धरमसिंग चव्हाण, पोलीस उपनिरीक्षक आनंदराव वाठोरे, पोलीस कर्मचारी इंगळे, गायकवाड यांनी घटनास्थळी भेट देऊन पंचनामा केला. याप्रकरणी लोहारा पोलीस ठाण्यात रात्री उशिरापर्यंत गुन्हा दाखल करण्याची प्रक्रिया सुरू होती.
चौकट......
ऐवज न मिळाल्याने केली दारूची पार्टी
चोरट्यांनी गावातील राम पाटील यांचेही घर फोडले. मात्र येथे त्यांच्या हाती काहीच लागले नाही. त्यामुळे चोरट्यांनी त्यांच्या घरात बसून देशी दारू पिऊन रिकाम्या बाटल्या घरात टाकल्या. त्यानंतर गावातीलच तानाजी अंबुरे यांचे घर फोडण्याचाही चोरट्यांनी प्रयत्न केला. परंतु, आवाज ऐकून घरातील सर्व सदस्य जागे झाल्याने व आरडाओरड केल्यामुळे चोरट्यांनी तेथून काढता पाय घेतला.