नवी मुंबई : मोबाईल चोरी करून पळणारा दोघा चोरट्यांना रेल्वे पोलिसांनी अटक केली आहे. एका चोरट्याचा पायात पाय अडकल्याने तो पडला असता वेळीच त्यांच्यावर रेल्वे पोलिसांनी झडप घातली. त्यांच्यावर पनवेल रेल्वे स्थानकात गुन्हा दाखल करण्यात आला आहे.
निखिल मढवी व विवेक प्रजापती अशी अटक केलेल्या मोबाईल चोरट्यांनी नावे आहेत. दोघेही खारघरचे राहणारे आहेत. रविवारी दुपारी उलवे येथे राहणारे अरविंदकुमार जैस्वार हे रेल्वेने पनवेलला चालले होते. ते प्रवास करत असलेली लोकल खारघर स्थानकात पोचली असता दबा धरून बसलेल्या एका चोरट्याने त्यांच्या हातातील मोबाईल हिसकावून धावत्या रेल्वेतून उडी मारून पळ काढला.
यावेळी जैस्वार यांनी देखील रेल्वेतून उडी मारून आरडा ओरडा करत त्यांचा पाठलाग केला. त्याचवेळी एका चोरट्याचा धावताना पाय अडकल्याने तो पडला, त्याचवेळी स्थानकात बंदोबस्तावर असलेल्या रेल्वे पोलिसांनी दुसऱ्याला देखील पकडले. दोघांना पनवेल रेल्वे पोलीस ठाण्यात आणले असता, त्यांच्याकडे जैस्वार यांचा चोरलेला मोबाईल आढळून आला. त्यांच्यावर जबरी चोरीचा गुन्हा दाखल करण्यात आला असून त्यांच्याकडून इतरही गुन्हे उघड होण्याची शक्यता आहे.