मीरारोड - भाईंदर पूर्वेच्या एका २८ वर्षीय तरुणीचे अपहरण, बलात्कार प्रकरणी आई व मुलासह त्याच्या साथीदारास नवघर पोलिसांनी अटक केली आहे. पोलिसांनी पीडित मुलीची वांद्रे येथून सुखरूप सुटका केली आहे.
भाईंदर पूर्वेला नवघर पोलीस ठाण्याच्या हद्दीत रविवारी सायंकाळी ६ च्या सुमारास अश्विनी ( नाव बदलले आहे ) नावाच्या २८ वर्षीय तरुणीचे दोन अनोळखी इसमांनी दुचाकीवरून अपहरण केल्याचा गुन्हा पोलिसांनी दाखल केला होता. ती वडिलां सोबत पायी घरी जात असताना ही घटना घडली होती.
वरिष्ठ पोलीस निरीक्षक विजय पवार यांनी घटनेचे गांभीर्य ओळखून तरुणीच्या शोधासाठी विविध पथके रवाना केली. तांत्रिक विश्लेषण द्वारे तपास करत वांद्रे भागातून तरुणीची सुटका केली. तिचे अपहरण करणाऱ्या दानिश अब्दुल शेख (२८) व त्याचा साथीदार चिराग शेखनूर शेख (३१) दोघेही रा. रझाक चाळ, जरीमरी, कुर्ला यांना अटक केली. दानिश याने तिला गुंगीचे औषध पाजून तिच्या सोबत अश्लील फोटो काढून तिला धमकावून नवी मुंबई भागात बलात्कार केल्याचे व तिच्याशी बळजबरीने निकाह करण्याच्या प्रयत्नात असल्याचे समोर आले. या प्रकरणात सहभागी दानिशची आई अफसाना अब्दुल शेख हिला देखील पोलिसांनी अटक केली आहे.
दानिश वर तरुणीच्या फिर्यादीवरून साकिनाका पोलीस ठाण्यात ३ एप्रिल रोजी बलात्काराचा गुन्हा दाखल असल्याचे सूत्रांनी सांगितले. पोलिसांनी हद्दीच्या कारणावरून विलंब करत दानिश याला वेळीच अटक केली नसल्याने त्याने तिचे रविवारी रात्री अपहरण करून नेल्यावर देखील तिच्यावर बलात्कार केल्याचे सकृतदर्शनी समोर आल्याचे सूत्रांनी सांगितले.