सदानंद नाईक, उल्हासनगर: रस्त्याने जाणाऱ्याचा धक्का लागल्याच्या रागातून लाकडी दांडक्याने मारहाण करून एकाचा खून केल्याचा प्रकार बुधवारी रात्री साडे बारा वाजता घडली. मध्यवर्ती पोलिसांनी काही तासातच सीसीटी टीव्ही फुटेज व तपासातून आरोपी अजय उर्फ अज्जू चौहान याला अटक करून खुनाचा गुन्हा दाखल केला.
उल्हासनगर कॅम्प नं-३ फॉरवर्ड लाईन येथून निरंजन यादव नावाचा इसम बुधवारी रात्री साडे बारा वाजता जात होता. त्यावेळी रस्त्यात उभ्या असलेल्या अज्जू उर्फ अजय चौहान याला धक्का लागला. धक्का लागल्यावरून दोघात तू तू मैं मैं झाली. त्यानंतर अजय चौहान याने लाकडी दांडके आणून मारहाण केली. मारहाणीत निरंजन यादव याचा जागीच मृत्यू झाला. रस्त्यात एक इसम निचपत पडल्याची माहिती मध्यवर्ती पोलीस ठाण्याच्या पोलिसांना मिळाल्यावर, त्यांनी घटनास्थळी धाव घेऊन निचपत पडलेल्या इसमाला मध्यवर्ती रुग्णालयात उपचार करण्यासाठी नेले. मात्र डॉक्टरांनी तपासून निरंजन यादव याला मृत घोषित केले.
मध्यवर्ती पोलीस ठाण्याचे वरिष्ठ पोलीस निरीक्षक मधुकर कड यांनी घटना घडली त्या परिसराचे सीसीटीव्ही फुटेज पोलीस पथकद्वारे तपासून मारहाण करणाऱ्यांची परिसरात चौकशी केली. मारहाण करणाऱ्याचे नाव अज्जू उर्फ अजय चौहान असून तो फॉरवर्ड लाईन परीसरात राहत असल्याचे समजले. पोलिसांनी काही तासात अजय चौहान याला अटक करून मध्यवर्ती पोलीस ठाण्यात खुनाचा गुन्हा दाखल केला. तर मयत इसम निरंजन यादव हा शहरातील खेमानी परिसरात राहणारा असून त्याच्या नातेवाईकांचा शोध पोलीस घेत आहेत. अधिक तपास मध्यवर्ती पोलीस करीत आहेत.