किनवट (जि. नांदेड) : दाढी करण्यासाठी सलूनमध्ये गेलेल्या तरुणाशी भांडण झाल्याने सलून चालकाने वस्तऱ्याने त्याच्या गळ्यावर वार केला. यामुळे तरुण मृत्युमुखी पडला. या घटनेमुळे संतप्त झालेल्या जमावाने सलून चालकाला बेदम मारहाण करीत ठार केले. ही खळबळजनक घटना गुरुवारी बोधडी बुद्रुक, ता. किनवट येथे सायंकाळी घडली. या घटनेने संपूर्ण तालुका हादरला आहे.
बोधडी (बु.) येथील व्यंकटी सुरेश देवकर (२२) हा गुरुवारी सायंकाळी साडेपाचच्या सुमारास अनिल मारोती शिंदे (३२ ) याच्या हेअर सलूनमध्ये दाढी करण्यासाठी गेला होता. तेव्हा काही कारणावरून दोघांत वाद झाला. त्यातून अनिल शिंदे याने दाढी करण्यासाठी वापरण्यात येणाऱ्या वस्तऱ्याने व्यंकटी देवकर याच्या गळ्यावर वार केला व तो पसार झाला. गंभीर जखमी झालेला व्यंकटी देवकर जीव वाचविण्यासाठी गळ्याला रुमाल धरत तेथून लगेच निघाला आणि ५० फूट चालत जाऊन कोसळला. अतिरक्तस्राव झाल्याने जागीच त्याचा मृत्यू झाला.
व्यंकटीच्या खुनाच्या घटनेमुळे येथे जमलेले गावातील लोक संतप्त झाले. त्यांनी मारेकरी अनिल शिंदे याचा शोध घेतला. तो नाल्याच्या काठी एका झुडपात लपून बसला होता. जमावाने त्यास शोधून, तेथून मारत-मारत मार्केटमध्ये आणून बेदम मारहाण केली. या मारहाणीत अनिलही ठार झाला. मृत अनिल हा गुन्हेगारी प्रवृत्तीचा असल्याचे सांगितले जात आहे.