अंबा कारखाना परिसरात मजुराचा खून

अंबाजोगाई: न्यायालयात सुरू असलेल्या कौटूंबिक प्रकरणाच्या तारखेसाठी अंबाजोगाईत आलेल्या बांधकाम मजुराचा मृतदेह अंबा कारखाना परिसरातील चतुरवाडी शिवारात बुधवारी आढळून आला. हा खून अनैतिक संबंधातून झाला असावा असा प्राथमिक अंदाज पोलिसांनी व्यक्त केला आहे.अंकुश मधुकर साठे (वय४०,रा. क्रांतीनगर) असे त्या खून झालेल्या मजुराचे नाव आहेत. अंकुश व त्याच्या पत्नीचा वाद विकोपाला गेला. त्यामुळे अंकुश याची पत्नी त्याला सोडून परभणी तालुक्यातील पिंपळदरी येथे माहेरी रहात आहेत. विभक्त होण्यासाठी त्यांचे प्रकरण अंबाजोगाईच्या न्यायालयात दाखल झालेले आहे. दरम्यान, पत्नी माहेरी असल्याने अंकुशचे शेजारच्या दोन मुले असलेल्या महिलेसोबत प्रेमसंबंध जुळले. यानंतर त्यांनी सहा वर्षांपूर्वी लातूर येथे पळून जाऊन संसार थाटला.अंकुशच्या पहिल्या पत्नीसाठीच्या प्रकरणाच्या तारखेसाठी तो दोन दिवसापुर्वी अंबाजोगाईत आला होता. बुधवारी सकाळी अंबा साखर कारखाना परिसरात अंकुश याच मृतदेह आढळून आला. अज्ञात मारेकऱ्यांनी त्याला चतुरवाडी शिवारात नेऊन प्रारंभी गळा आवळून पोटावर, मांडीवर व गुप्तांगावर चाकूचे वार करून खून केला असल्याचे तपासात समोर आले.बुधवारी सकाळी चतुरवाडी शिवारात मृतदेह दिसताच नागरिकांनी ग्रामीण पोलिसांना माहिती दिल्यानंतर उपअधीक्षक निलेश मोरे, सहाय्यक पोलिस निरीक्षक ए. पी. लाटकर यांनी घटनास्थळाला भेट देऊन पंचनामा केली. गर्दीतीलच मनोज साठे या तरुणाने आपल्याच भावाचा खून झाल्याचे पोलिसांना सांगितले. यानंतर मनोज साठे याच्या फिर्यादीवरून ग्रामीण पोलिस ठाण्यात अज्ञात मारेकऱ्याविरुद्ध व अज्ञात कारणावरून खून केल्याचा गुन्हा नोंद झाला आहे. पुढील तपास सहाय्यक पोलिस निरीक्षक ए. पी. लाटकर करीत आहेत. (वार्ताहर)