अज्ञात वाहनाच्या धडकेने महिला ठार

संगीता विठ्ठल तुपे (वय ३८, रा. मयूर पार्क) असे मृत महिलेचे नाव आहे. बेगमपुरा पोलिसांनी सांगितले की, संगीता या सोमवारी दुपारी सव्वाएक वाजण्याच्या सुमारास हर्सुल टी पॉईंटकडून जटवाडा रस्त्याने जात होत्या. जटवाडा रस्त्यावरील सहारा वैभवजवळ अज्ञात वाहनाने त्यांना उडविले आणि वाहनचालक वाहनासह पसार झाला. यानंतर संभाजी सोनवणे आणि शिवाजी सोनवणे यांनी त्यांना गंभीर जखमी अवस्थेत घाटीत दाखल केले. अपघात विभागाच्या डॉक्टरांनी त्यांना तपासून मृत घोषित केले. याप्रकरणी बेगमपुरा ठाण्यात आकस्मिक मृत्यूची नोंद करण्यात आली. त्यांना उडविणारा हायवा ट्रक असण्याची शक्यता वर्तविली जात आहे. मृत संगीता या माजी महापौर सुदाम सोनवणे यांच्या भाची होत. त्यांना मुलगा, मुलगी आहे.