वाळूज महानगर : घरासमोर लघुशंका करण्याच्या कारणावरुन पती-पत्नीस बेदम मारहाण केल्याची घटना सोमवारी (दि.९) रात्री ८ वाजेच्या सुमारास वडगाव कोल्हाटी येथे घडली.
शेख आमेर वजीर (३०) हे सोमवारी रात्री ८ वाजता कुटुंबासोबत घरासमोर गप्पा मारत होते. तेव्हा घराच्या बाजूला लघुशंका करणाऱ्या दोन तरुणांना शेख आमेर यांनी जाब विचारला. त्या तरुणांनी शिवीगाळ करुन शेख आमेर यांना मारहाण केली. आमेर यांच्या पत्नीने मध्यस्थी केली असता तरुणासोबतच्या अन्य दोघांनी पती-पत्नीला मारहाण केली व पळून गेले. या चौघा अनोळखीविरुध्द एमआयडीसी वाळूज पोलीस ठाण्यात गुन्हा दाखल करण्यात आला.
-------------------
पिस्टल बाळगणाऱ्यास तीन दिवसाची कोठडी
वाळूज महानगर : वडगाव परिसरात पिस्टल बाळगणाऱ्या कुख्यात आरोपी राजू दहातोंडे यास मंगळवारी (दि.१०) न्यायालयात हजर केले असता त्यास तीन दिवसाची पोलीस कोठडी सुनावण्यात आली.
राजू दहातोंडे याला एमआयडीसी वाळूज पोलिसांनी सोमवारी पिस्टलसह अटक केली होती. उपनिरीक्षक सतीश पंडित हे पुढील तपास करीत आहेत.
------------------------
बजाजनगरातून दुचाकी लंपास
वाळूज महानगर : बजाजनगरातून दुचाकी लांबविणाऱ्या चोरट्याविरुध्द एमआयडीसी वाळूज पोलिस ठाण्यात गुन्हा दाखल करण्यात आला. अवधूत व्यंकटराव मल्हारे (रा.साईनगर) हा ४ नोव्हेंबरला दुचाकीने (क्रमांक एम.एच.२०, ई.बी.९०३८) जाजनगरात बहिणीच्या घरी गेला होता. रात्रीच्यावेळी चोरट्याने दुचाकी चोरुन नेली.
-------------------------
वाळूजला फरार दोघे जेरबंद
वाळूज महानगर : गत पाच वर्षापासून फरार असलेल्या दोन आरोपींना वाळूज पोलिसांनी सोमवारी (दि.९) जेरबंद केले.
आरोपी सुवर्णा उर्फ ईराणी वायरलेस पवार (४२, रा. विजयनगर, वाळूज) व तोजसबाई वासुदेव उर्फ रमेश बहिऱ्या काळे (३८, रा.शिवराई) या दोघा आरोपीविरुध्द वाळूज पोलीस ठाण्यात गंभीर स्वरुपाचे गुन्हे दाखल आहे. खबऱ्याने आरोपींची माहिती पोलिसांना देताच पोलीस पथकाने सापळा रचून या दोघा आरोपींना जेरबंद केले.
---------------------------