पाचोड : सोलापूर-धुळे राष्ट्रीय महामार्गावरील वडीगोद्रीजवळ अज्ञात वाहनाने एका कारला पाठीमागून जोराची धडक दिली. या अपघातात कारमधील एका तरुणाचा जागीच मृत्यू झाला, तर अन्य चार जण गंभीर जखमी झाले. हा अपघात भीषण होता की, अज्ञात वाहनाने कारला जवळपास दोनशे फूट अंतरावर फरपटत नेले. अखेर कार दुभाजकावर जाऊन धडकली. शनिवारी सकाळी पावणे सात वाजेच्या सुमारास ही घटना घडली असून शिव पुरुषोत्तम अग्रवाल (१७) असे मृत तरुणाचे नाव आहे. तर अन्य चार जणांवर रुग्णालयात उपचार सुरू आहेत.
पाचोड पोलिसांकडून मिळालेल्या माहितीनुसार, औरंगाबाद येथील शिव पुरुषोत्तम अग्रवाल हा शनिवारी पहाटेच आपल्या कॉलेजच्या मित्रांबरोबर बीडमधील गेवराईच्या मित्राला भेटण्यासाठी कार (एम.एच.- २० सी.यू.- ९७८६) गेला होता. मित्राला भेटून झाल्यावर औरंगाबादकडे पुन्हा परतला. महामार्गावरील वडीगोद्रीजवळील पुलावरून जात असताना बीडकडून औरंगाबादकडे सुसाट वेगाने जात असलेल्या एका अज्ञात वाहनाने कारला पाठीमागून जोराची धडक दिली. या भीषण अपघातात कारमध्ये पाठीमागे बसलेला शिव पुरुषोत्तम अग्रवाल (१७) हा कारमध्ये दबला गेला. त्यात त्याचा जागीच मृत्यू झाला, तर कारमधील कामील खान शब्बीरखान (१६), क्षितिश मनीष रणखांब (१६), ओम अग्रवाल (१६) व चालक शेख मंजूर शेख बशीर (५२) (सर्व रा. औरंगाबाद) हे चार जण जखमी झाले.
अपघाताची माहिती पाचोड पोलिसांना आणि पाचोड येथील संजय सेठी यांना कळताच त्यांनी घटनास्थळी धाव घेतली. पोलीस ठाण्याचे सपोनि. अतुल येरमे, पोलीस जमादार सुधाकर मोहिते, संजय सेठी, राजेश सेठी, बाळासाहेब बोचरे यांनी तातडीने घटनास्थळी दाखल होऊन जखमींना पाचोड येथील ग्रामीण रुग्णालयात उपचारासाठी दाखल करण्यात आले. यावेळी वैद्यकीय अधिकारी डॉ. संदीपान काळे, डॉ. बाबासाहेब घुगे यांनी शिव अग्रवाल यास मयत घोषित केले. जखमी झालेल्या अपघातग्रस्तांना पुढील उपचारासाठी घाटी रुग्णालयात हलविण्यात आले. पाचोड पोलीस ठाण्यात अपघाताची नोंद करण्यात आली आहे. शिव अग्रवाल याचे शवविच्छेदन झाल्यानंतर मृतदेह नातेवाइकांच्या ताब्यात देण्यात आला. पुढील तपास सपोनि. अतुल येरमे व पोलीस जमादार सुधाकरराव मोहिते करीत आहेत.
--------
मनमिळाऊ स्वभावाचा होता शिव
अपघातात मृत झालेला तरुण शिव अग्रवाल हे अत्यंत मनमिळाऊ स्वभावाचा होता. महाविद्यालयीतील हुशार मुलगा म्हणून त्याची ओळख होती. विविध स्पर्धांमध्ये सहभागी होणे, त्यात प्रावीण्य मिळविणे, असा त्याचा स्वभाव होता. शालेय जीवनापासूनच त्याने विविध पुरस्कारावर मोहर लावली होती. सर्वांच्या लाडक्या मित्रांचा दुर्दुैवी मृत्यू झाल्याने सर्वत्र हळहळ व्यक्त केली जात आहे.
------
फोटो - अपघातात चेंदामेंदा झालेली अपघातग्रस्त कार, तर इन्सेटमध्ये मृत शिव अग्रवाल.