शिवजयंतीनिमित्त आज मुख्य मिरवणूक

औरंगाबाद : छत्रपती शिवाजी महाराज यांच्या जयंतीनिमित्त शुक्रवारी शहरात विविध कार्यक्रमांचे आयोजन करण्यात आले आहे. जिल्हा शिवजयंती महोत्सव समितीतर्फे सकाळी ८ वाजता क्रांतीचौक येथील महाराजांच्या पुतळ्यास दुग्धाभिषेक करण्यात येणार आहे. दुपारी साडेचार वाजता राजाबाजार येथील संस्थान गणपती येथून मुख्य मिरवणुकीचे आयोजन करण्यात आले आहे.राजाबाजार येथील संस्थान गणपतीची आरती केल्यानंतर शिवजयंती मिरवणुकीला प्रारंभ होईल. याप्रसंगी विधानसभा अध्यक्ष हरिभाऊ बागडे, खा. चंद्रकांत खैरे, महापौर त्र्यंबक तुपे, शिवजयंती महोत्सव समितीचे संस्थापक अध्यक्ष पृथ्वीराज पवार, विभागीय आयुक्त उमाकांत दांगट, जिल्हाधिकारी निधी पांडे, पोलीस आयुक्त अमितेशकुमार, जि. प. मुख्य कार्यकारी अधिकारी अभिजित चौधरी यांच्यासह लोकप्रतिनिधी आणि विविध राजकीय पक्षांचे पदाधिकारी उपस्थित राहणार आहेत. ही मिरवणूक शहागंज, गांधी पुतळामार्गे सिटीचौक, गुलमंडी, पैठणगेटमार्गे क्रांतीचौक अशी जाईल. नागरिकांनी सहभागी व्हावे, असे आवाहन अध्यक्ष संदीप शेळके, कार्याध्यक्ष अजय पाटील चिकटगावकर, विश्वास औताडे, विनोद तांबे, अनिल मानकापे यांनी केले आहे. नवीन औरंगाबाद शिवजयंती उत्सव समितीकडूनही सकाळी ९ वाजता शहरात वाहन रॅलीचे आयोजन करण्यात आले.