औरंगाबाद: रेल्वे आणि यूथ इंटरनॅशनल स्काउट ॲण्ड गाईड मध्ये विविध पदावर नोकरी लावण्याच्या आमिषाने सुशिक्षित बेरोजगारांची फसवणूक करणाऱ्या भामट्याला आर्थिक गुन्हे शाखेने सोमवारी रात्री अटक केली.
अशोक साहेबराव वैद्य (२९, रा. जमनज्योती, हर्सूल ) असे आरोपीचे नाव आहे. तो नाशिक येथे शासकीय अंध मुलींच्या निवासी शाळेतील निलंबित कनिष्ठ काळजीवाहक आहे. तक्रारदार योगेश नामदेव गोरे (रा. पुष्पक गार्डन, चिकलठाणा) हे पदव्युत्तर पदवीधर असून नोकरीच्या शोधात आहेत. गतवर्षी त्यांची ओळख आरोपी वैद्यसोबत झाली. तेव्हा त्याने त्यांची रेल्वेच्या वरिष्ठ अधिकाऱ्यांसोबत ओळख असून त्याने अनेकांना टी. सी. म्हणून नोकरी लावल्याचे सांगितले. योगेशला रेल्वेत नोकरी लावण्याचे आमिष दाखवून ११ लाख रुपयांची मागणी केली. योगेशने पैसे देण्याची तयारी दर्शविली आणि लगेच त्याच्या बॅंंक खात्यात ५० हजार रुपये जमा केले. उर्वरित साडेदहा लाख त्यांनी रोखीने दिले. वैद्यने योगेश आणि अन्य एक तरुण अक्षय गायके यांच्याकडून प्रत्येकी ११ लाख रुपये घेऊन त्यांना नियुक्तीपत्रे दिली. त्यांना दिल्लीला पाठवले. दोन दिवसाने तो तेथे आला. तेथून त्यांना बिहारमध्ये नेले. तेथे प्रशिक्षणाच्या नावाखाली त्यांना १५ दिवस ठेवले. यानंतर ते परतले. हा सगळा बनवाबनवीचा प्रकार असल्याचे समोर येताच योगेश आणि अक्षयने पैशाची मागणी केली. सुरूवातीला आज उद्या करून टाळाटाळ करू लागला. त्यांनी जास्त तगादा लावल्यावर त्याने ४ लाख रुपये परत केले. आणि पाच लाखांची उसनवारी पावती तयार करून दिली. एक लाख रुपये नगदी देण्याचे सांगितले. मात्र त्याने पैसे दिले नाही.
त्याने जालना रोडवरील कुशलनगर येथे यूथ इंटरनॅशनल स्काउट ॲण्ड गाईडचे कार्यालय थाटले. या कार्यालयातर्फे त्याने अनेकांना विविध पदाच्या नियुक्तीपत्रे देऊन लाखों रुपये उकळून फसवणूक केली.
चौकट
पोलीस आयुक्तांच्या आदेशाने झटपट कारवाई
वैद्यने अनेकांना गंडविल्याचे समोर येताच योगेशसह सुमारे दहा जणांनी पोलीस आयुक्त डॉ. निखिल गुप्ता यांची भेट घेऊन तक्रार केली. आयुक्तांनी दिलेल्या आदेशानंतर गुन्हे शाखेचे सहाय्यक निरीक्षक अजबसिंग जारवाल आणि कर्मचाऱ्यांनी सोमवारी दुपारी त्याला ताब्यात घेतले. चौकशीनंतर त्याच्याविरुद्ध रात्री जवाहरनगर ठाण्यात गुन्हा दाखल करून रात्री त्याला अटक करण्यात आली.
====
२७ नोव्हेंबरपर्यंत पोलीस कोठडी
या गुन्ह्याचा तपास आर्थिक गुन्हे शाखेकडे येताच पोलीस निरीक्षक डी. एस. शिनगारे यांच्या मार्गदर्शनाखाली उपनिरीक्षक अजय सूर्यवंशी, हवालदार विठ्ठल मानकापे, महेश उगले यांनी त्याला न्यायालयात हजर केले. न्यायालयाने त्याला २७ नोव्हेंबरपर्यंत पोलीस कोठडी सुनावली.