श्रीगुरुगोविंदसिंघजी स्टेडियम होणार आंतरराष्टÑीय दर्जाचे क्रिकेटचे मैदान

 डॉ. बळीराम लाड, नांदेड :येथील श्रीगुरुगोविंदसिंघजी स्टेडियमवर मनपा व क्रीडा विभाग यांच्या वतीने आता आंतरराष्टÑीय दर्जाचे क्रिकेट मैदान होणार आहे. श्री गुरुगोविंदसिंघजी स्टेडियमवर ३५ हजार प्रेक्षक क्षमतेची गॅलरी, व्हीआयपी पॅव्हेलियन, अरदन माऊंट आदी कामे झाली आहेत. लवकरच ५ विकेट ब्लॉक, ६ सराव क्रिकेट पीच व नॅचरल ग्रास प्लेर्इंग फिल्ड असणारे आंतरराष्टÑीय दर्जाचे क्रिकेटचे मैदान तयार होणार आहे. याबाबत मनपाच्या यावर्षीच्या अंदाजपत्रकात अडीच कोटी रुपयांची तरतूदही करण्यात आली आहे. स्टेडियमला निधी क्रीडा विभागाचा पण मालकी मनपाची असल्याने बर्‍याच वर्षांपासून स्टेडियमचे उर्वरित काम रखडले होते. मनपाने पहिल्यांदाच स्टेडियम विकासासाठी अंदाजपत्रकात भरीव तरतूद केल्याने आता स्टेडियमचे काम पूर्ण होण्याच्या मार्गावर आहे. आंतरराष्टÑीय दर्जाचे क्रिकेट मैदान झाल्यावर रणजी, एक दिवसीय क्रिकेट सामने या ठिकाणी होणार असल्याने क्रीडा क्षेत्रात आनंद व्यक्त होत आहे. एकीकडे आंतरराष्टÑीय दर्जाचे क्रिकेट मैदान होत असताना एका क्रिकेट या खेळाच्या मैदानामुळे दुसर्‍या मान्यताप्राप्त खेळांना हे मैदान मात्र सराव व स्पर्धेसाठी वापरता येणार नाही. हे सर्व पाहता ३५ हजार क्षमतेच्या या स्टेडियमजवळ आता वाहनतळाच्या नियोजित जागेचीही मनपाला तरतूद करावी लागणार आहे. याबरोबर नांदेडला विभागीय क्रीडा संकुल मिळाल्यास क्रिकेट व इतर खेळाडू आपल्या खेळाचा सराव व स्पर्धा या विभागीय क्रीडा संकुलात घेतील म्हणून या आंतरराष्टÑीय क्रिकेटच्या मैदानाबरोबर राज्य क्रीडा विभागाच्या वतीने विभागीय क्रीडा संकुल उभारावे, अशी मागणी क्रीडा क्षेत्रातून होत आहे. महापालिकेने २०१४- १५ च्या अर्थसंकल्पात आंतरराष्ट्रीय दर्जाच्या क्रिकेटच्या मैदानासाठी तरतूद केली असून प्रशासनाकडून हा अर्थसंकल्प स्थायी समिती समोर सादर झाला आहे़ हा प्रस्ताव स्थायीने मंजुर केल्यानंतर तो सर्वसाधारण सभेत मंजुरीसाठी जाईल़ ही प्रक्रिया येत्या महिन्याभरात पूर्ण होवून आंतरराष्ट्रीय दर्जाच्या स्टेडियमला मंजुरी मिळणार आहे़