मुलगा आणि सुनेचे घरातील ज्येष्ठ नागरिकांशी न पटणे, ही समस्या आज अनेक घरांमध्ये दिसून येते. मात्र मुलगा आणि सून दोघेही कामानिमित्त घराबाहेर गेले की त्यांना त्यांचे स्वातंत्र्य मिळते आणि ज्येष्ठांना घरात मुक्त श्वास घेता येतो. परंतु लॉकडाऊनदरम्यान सगळे घरीच असल्यामुळे भांड्याला अधिकच जोरात भांडे लागू लागले आणि घरातील भांडणे विकोपाला जाऊ लागली. याचीच परिणीती म्हणून पोलीस आयुक्तालयातील ज्येष्ठ नागरिक कक्षात येणाऱ्या तक्रारी वाढल्याचे दिसते.
संवाद खुंटणे आणि एकमेकांना समजून न घेणे, हेच या सगळ्या तक्रारींचे मुळ आहे. आज महिला ज्याप्रमाणे त्यांच्या अधिकारांबाबत जागरूक झाल्या आहेत, त्याचप्रकारची ज्येष्ठ नागरिक कायद्याबाबतची जागरूकता ज्येष्ठांमध्ये आली आहे.
चौकट :
कुटुंबीयांकडून दुर्लक्ष
१. आपण म्हातारे झालो, म्हणजे आता कुटुंबीयांसाठी निरूपयोगी ठरतो आहोत, ही भावना ज्येष्ठांच्या मनात बळावत आहे.
२. कामाचा ताण, सोशल मीडियामुळे स्वत:भोवती निर्माण झालेले आभासी जग यामुळे तरूणाईला आपल्या सभोवतालच्या माणसांचा विसर पडतो. यातूनच संवाद खुंटतो आणि दोन पिढ्यांमध्ये अंतर निर्माण होते.
३. पोलीस आयुक्तालयातील ज्येष्ठ नागरिक कक्षामध्ये फोनद्वारे तक्रारी येण्याचे प्रमाण अधिक आहे. मात्र लेखी स्वरूपात तक्रार देणाऱ्यांचे प्रमाण कमी आहे.
४. तक्रार आल्यानंतर जेव्हा समुपदेशनासाठी बोलविले जाते, तेव्हा मुलगा, सून यांच्याकडून टाळाटाळ केली जाते.
५. मुलाने घर बळकावले, माझ्याच घरातून मला बाहेर काढले, आम्हीच आमच्या घरात परके झालो आहोत, सून आमच्याशी बोलत नाही, सून आमचा राग- राग करते, नातवंडांना आमच्यापासून दूर करते, अशा स्वरूपाच्या तक्रारी घेऊन येणाऱ्या ज्येष्ठ नागरिकांचे प्रमाण अधिक आहे.
चौकट :
ज्येष्ठांना समजून घ्या
सून विचारत नाही, औषधी आणून देत नाही, घरात आमच्याशी कुणी बोलत नाही, अशा ज्येष्ठांकडून येणाऱ्या तक्रारी अगदीच कौटुंबिक स्वरूपाच्या असतात. बऱ्याचदा एकमेकांमध्ये कमी होत चाललेला संवाद हेच या तक्रारींचे खरे कारण असते. वृद्धांकडूनही काही चुका होत असतील, पण तरूणांनी त्यांच्या वयाचे भान ठेवून त्यांच्याशी सामंजस्याने वागणे गरजेचे आहे. ज्येष्ठांच्या भावनांना समजून घेतले तर बहुतांश घरातील ज्येष्ठ नागरिकांच्या समस्या दूर होतील
- किरण पाटील
पोलीस निरीक्षक
चौकट :
तक्रारींचे प्रमाण
महिना... फोनद्वारे येणाऱ्या तक्रारी... लेखी तक्रारी
एप्रिल ... ५.... ३
मे .... ५.... ३
जून... २०.... ४
जूलै .... १४..... ४
ऑगस्ट .... १० .... ४
सप्टेंबर .... १०.... ३
ऑक्टोबर .... ८ .... ४