सय्यद लाल
बाजारसावंगी : एकीकडे सर्वसामान्यांच्या घरात गॅस पोहोचल्यानंतर गॅसच्या दराने आकाशपाताळ एक करीत सिक्सर मारलेला असताना, दुसरीकडे ग्राहकांच्या खात्यात दिली जाणारी सबसीडी दोनशे रुपयांवरून घसरत अवघ्या तीन रुपयांवर आल्याने सर्वसामान्यांची लूट होऊ लागली आहे, तर सर्वसामान्यांचे बजेट देखील कोलमडले आहे.
दोन वर्षांपूर्वी १४ किलो वजनाच्या गॅसला पाचशे ते सहाशे रुपये दर आकारला जात असे. यात प्रत्येक तारखेस कमी-अधिक किंमत आकारली जात असे. दुसरीकडे या गॅसची ग्राहकास सबसीडी अनुदान ग्राहकांच्या खात्यात दोनशे ते तीनशे रुपये जमा केले जाते असे. नोव्हेंबर २०२० मध्ये १४ किलोच्या सिलिंडरची किंमत ६०३ रुपये होती. एक डिसेंबरला ६०३ रुपये, दोन तारखेला ६५३, तर १४ तारखेला ७०३ अशी एकाच महिन्यात तीन तीन वेळा गॅस दरात वाढ झाल्याने हा गॅस भाववाढीचा उच्चांक निर्माण केला गेला. आता गुरुवारी रात्री पुन्हा वीस रुपयांची वाढ झाल्याने आता गॅसचा दर ७२३ रुपये असणार आहे. त्यामुळे सर्वसामान्यांचे बजेट कोलमडले असून या महिन्यापासून ग्राहकांच्या खिशाला चांगलीच झळ बसणार आहे. सरकारी धोरणामुळे गॅसच्या किमतीत कधी वाढ होईल, हे सांगताच येणार नाही.
ग्राहकांची मांडली थट्टा
गेल्या वर्षभरात प्रत्येक महिन्याला गॅसमागे दोनशे ते तीनशे रुपयांपर्यंत अनुदान दिले जात होते. त्यामुळे सहाशे रुपयांचा गॅस हा ग्राहकांना चारशे ते साडेचारशे रुपयांना मिळत असल्याने ग्राहकांना काहीअंशी दिलासा होता. परंतु डिसेंबर २०२० या एकाच महिन्यात तीनदा गॅसचे दर वाढले आहेत, तर गुरुवारी देखील वीस रुपयांची वाढ झाल्याने गॅसचे दर साडेसातशे रुपयांवर गेले. परंतु ग्राहकांना दिले जाणारे अनुदान केवळ तीन रुपये दिले जात असल्याने यात त्यांची थट्टा मांडली जात आहे. भाववाढीच्या तुलनेत सबसीडीत वाढ करण्याऐवजी घट झाल्याने सर्वसामान्यांच्या खिशाला झळ बसू लागली आहे.
------
गृहिणींचे बजेट कोलमडले
दीड ते दोन वर्षांपूर्वी १४ किलोचा गॅस सिलिंडर चारशे ते पाचशे रुपयांपर्यंत होते. त्यात गेल्या दोन महिन्यात गॅसचे दर गगनाला भिडले आहेत. परंतु त्याचप्रमाणे दिल्या जाणाऱ्या सबसीडीत मात्र घट झाली. दोनशे रुपयांची सबसीडी तीन रुपयांवर आल्याने महिन्याचे बजेट कोलमडले जाते.
- सविता अधाने, गृहिणी