काटशेवरी फाटा ते जटवाडामार्गे औरंगाबाद मार्गावर रसूलपुरा घाट असून या मार्गाचे काम नुकतेच पूर्ण करण्यात आले आहे. खुलताबाद तालुक्यातील गदाणा, टाकळी राजेराय, बोडखा, धामणगाव, लोणी, घोडेगाव, गोळेगाव, सोनखेड्यासह परिसरातील ग्रामस्थांना औरंगाबादला जाणारा हा अत्यंत जवळचा रस्ता आहे. यासह सिडको, हडको, हर्सूल टी पॉइंट परिसरातील अनेक भाविक याच रस्त्याने भद्रा मारुतीच्या दर्शनासाठी येत असतात. रसूलपुरा घाटातील दरड कोसळण्याची घटना गेल्या काही दिवसांपासून सुरू होती. परंतु गेल्या पाच दिवसांपासून संततधार पावसामुळे घाटातील मोठी दरड रविवारी दुपारी बारा वाजेच्या सुमारास कोसळल्याने पूर्ण रस्ता बंद झाला होता. काही दुचाकीस्वारांनी दुचाकी जाईल एवढा रस्ता मोकळा केला. त्यानंतर या रस्त्याचे काम करणाऱ्या ठेकेदाराने जेसीबीच्या साहाय्याने संबंधित दगड बाजूला करत मोकळा केल्यानंतर वाहतूक सुरळीत झाली. रसूलपुऱ्याचे सरपंच सलीम पठाण म्हणाले की, या रस्त्यावरील दरड कधीही कोसळू शकते, त्यामुळे उपाययोजना करण्यात याव्यात, असे पत्र सार्वजनिक बांधकाम विभागास दिले होते. मात्र त्यांनी याकडे दुर्लक्ष केल्याचे पठाण म्हणाले. दरड कोसळली तेव्हा सुदैवाने कुणीही त्या मार्गावर नव्हते. त्यामुळे अनर्थ टळला.
-- फोटो : रसूलपुरा घाटात कोसळलेली दरड. यामुळे काही वेळ रविवारी या मार्गावरील वाहतूक खोळंबली होती.
220821\img-20210822-wa0027.jpg
रसूलपरा घाटात दरड कोसळून वाहतुक खोळंबली होती.