पाचोड : गावातील शिवाजीनगर भागात गुरुवारी रात्री मोबाईलवर लुडो गेम खेळण्याच्या कारणावरून एकाने चाकू हल्ला केल्याची घटना पुढे आली. या हल्ल्यात दोन जण जखमी झाले असून त्यांच्यावर पाचोड ग्रामीण रुग्णालयात उपचार सुरू आहे.
पाचोड पोलीस सूत्रांकडून मिळालेल्या माहितीनुसार पाचोडच्या शिवाजीनगर भागात राहणाऱ्या लखन रामलाल परमेश्वर हा गुरुवारी सायंकाळी ८ वाजताच्या सुमारास घरासमोरील शाळेजवळ बसला होता. यावेळी गावातील अमोल मच्छींद्र मगरे तिथे येत लखन यास म्हणाला माझ्यासोबत मोबाईलवरून पैशावर लुडो गेम खेळ. यादरम्यान लखनने अमोलला मला लुडो खेळता येत नाही तू दुसऱ्यासोबत लुडो खेळ असे उत्तर दिले. यानंतर अमोल याने लखन यास शिवीगाळ करण्यास सुरुवात केली आहे. अमोलची आई दोघांचे भांडणे सोडण्यासाठी प्रयत्न करत होती; पण अमोल ऐकत नव्हता. यानंतर थोड्याच वेळात लखनच्या आई-वडिलांनीसुद्धा भांडण सोडविण्याचा प्रयत्न केला. पण अमोल कुणाचेही ऐकण्याच्या स्थितीत नव्हता. त्याने लखनचे वडील रामलाल परमेश्वर यांच्यावर चाकूने हल्ला केल्याने ते गंभीर जखमी झाले. तर आई विमल परमेश्वर यांना शिवीगाळ करून मारहाण केली. वाद वाढत गेल्याने गावातील नागरिकांनी दोघांची भांडणे सोडवत या घटनेची माहिती पाचोड पोलिसांना दिली. यावेळी सपोनि गणेश सुरवसे, पोलीस जमादार सुधाकरराव मोहिते यांनी घटनास्थळी भेट देत पंचनामा केला. जखमी रामलाल व विमल परमेश्वर यांना उपचारासाठी पाचोडच्या ग्रामीण रुग्णालयात दाखल करण्यात आले आहे. लखन रामलाल परमेश्वरच्या फिर्यादीवरून अमोल मच्छींद्र मगरे विरोधात गुन्हा दाखल करण्यात आला आहे.
--- फोटो