‘करबुडवेगिरी’त समोर आली सहा अधिकाऱ्यांची नावे

औरंगाबाद : आरटीओ कार्यालयातील ‘करबुडवेगिरी’ प्रकरणाच्या अहवालात सहा अधिकाऱ्यांची नावे समोर आली आहेत. या प्रकरणात प्रत्येक अधिकाऱ्यांचा किती सहभाग आहे, याची चौकशी केली जात आहे. त्यानंतर यासंदर्भात शासनास अहवाल सादर करण्यात येणार आहे, अशी माहिती परिवहन आयुक्त श्याम वर्धने यांनी ‘लोकमत’शी बोलताना दिली.२०११-१३ या कालावधीत ट्रान्सपोर्ट संवर्गातील वाहन नॉन ट्रान्सपोर्ट संवर्गात रूपांतरित करताना ६०० पेक्षा अधिक वाहनांनी नियमानुसार कर न भरता शासनाचा कोट्यवधींचा महसूल बुडविल्याचा प्रकार नुकताच उघडकीस आला आहे. या प्रकाराकडे जाणीवपूर्वक दुर्लक्ष करण्यात येत होते. त्यामुळे याविषयी काहींनी थेट परिवहन आयुक्तालयात तक्रार केली. त्यामुळे तब्बल तीन वर्षांनंतर हे प्रकरण समोर आले. याविषयी परिवहन आयुक्तांनी मुंबईहून या प्रकरणाच्या तपासासाठी पथक पाठविले होते. या पथकाने केलेल्या चौकशीचा अहवाल परिवहन आयुक्तांना प्राप्त झाला आहे. २०११-१३ या कालावधीतील सहायक प्रादेशिक परिवहन अधिकाऱ्यांवरच प्रामुख्याने कारवाईची शक्यता वर्तविण्यात येत आहे. चौकशी करून अहवाल शासनास दिला जाणार आहे.