नवा मोंढा, जाधववाडी येथील जनरल व्यापारी संकुलाच्या छतावर नेहमीप्रमाणे शुक्रवारी सकाळी ७.४५ वाजेच्या सुमारास काही लोक लघुशंका करण्यासाठी गेले. तेव्हा तेथे अनोळखी व्यक्ती रक्ताच्या थारोळ्यात निपचित पडलेली दिसली. हे दृश्य पाहून तीन ते चार जण दूरवरच उभे राहिले. सुरक्षारक्षक पुरविणाऱ्या कंपनीचे कार्यालय तेथेच असल्यामुळे सुपरवायझर दिलीप सुरेश बोर्डे हे त्या लोकांना हाकलण्यासाठी तेथे गेले असता त्यांना हा खुनाचा प्रकार असल्याचे दिसले. त्यांनी लगेच पोलीस उपनिरीक्षक एकनाथ इंगळे यांना ही घटना कळविली. इंगळे यांनी सिडको पोलीस ठाण्याला याविषयी माहिती दिली. यानंतर पोलीस उपायुक्त दीपक गिऱ्हे, पोलीस निरीक्षक अशोक गिरी, पोलीस निरीक्षक अविनाश आघाव, सहायक निरीक्षक सुनील अरबाड, फौजदार बाळासाहेब आहेर आणि गुन्हे शाखेच्या अधिकाऱ्यांनी घटनास्थळी धाव घेतली.
===============
मयत आणि आरोपी ओळखीचे
मारेकऱ्यांनी काहीतरी वादातून या व्यक्तीचा सिमेंट गट्टूने डोके ठेचून खून केल्याचे दिसून आले. सिमेंट गट्टूच्या ठिकऱ्या झाल्याचे दिसून आले. आरोपी आणि मयत हे परस्परांच्या ओळखीचे असण्याची शक्यता पोलिसांनी वर्तविली. गांजाच्या गोळ्या, पाण्याची बाटली तेथे आढळून आली. कदाचित नशापाणी करण्यावरून झालेल्या वादात हा खून करण्यात आल्याचा पोलिसांना संशय आहे. मयताची ओळख पटलेली नाही.
===============
हमाल, मजूर असण्याची शक्यता
खून झालेल्या व्यक्तीची ओळख पटविण्यासारखे ओळखपत्र अथवा कागदपत्रे घटनास्थळी आढळून आली नाहीत. मयताच्या अंगावर काळी पँट, चॉकलेटी फुलांचा शर्ट, बनियन आणि अंडरपँट होती. याशिवाय मृतदेहाशेजारीच रुमालात बांधलेला गाठोड्यात शर्ट-पँट आणि अंडरपँट बनियन होती. मृतदेहाच्या उशाजवळ चिल्लर पाच ते सात नाणी आणि दोन गांजाच्या गोळ्या पडलेल्या होत्या.
=====================
खिचडीचे पार्सल तसेच पडून
खून झालेल्या व्यक्तीजवळ खिचडीचे पार्सल जसेच्या तसे होते. यावरून मयताने स्वतःसाठी हे पार्सल रात्री बाजार समितीमधील एका हॉटेलमधून आणले असावे. मात्र, ही खिचडी त्याने खाल्लेली दिसत नाही.
==========
फॉरेन्सिक पथकाने गोळा केले काही नमुने
घटना समोर आल्यावर न्याय सहायक प्रयोगशाळेच्या पथकाला तेथे पाचारण करण्यात आले. पथकातील अधिकारी, कर्मचाऱ्यांनी घटनास्थळावरील रक्ताचे नमुने, काही केस आणि अन्य वस्तू जप्त केल्या.