वाळूज महानगर : रांजणगावातून एक २७ वर्षीय महिला बेपत्ता झाल्याची तक्रार तिच्या पतीने एमआयडीसी वाळूज पोलीस ठाण्यात दिली. प्रियंका राहुल पुंडगे ही महिला ११ फेब्रुवारीला सायंकाळी ६ वाजता घरातून निघून गेली. सर्वत्र शोध घेऊनही ती मिळून न आल्याने तिचा पती राहुल पुंडगे यांनी पोलीस ठाणे गाठले.
फोटो क्रमांक- प्रियंका पुंडगे (बेपत्ता)
----------------------------
पंढरपुरात सांडपाणी उघड्यावर
वाळूज महानगर : पंढरपूर ग्रामपंचायतीलगत असलेल्या वॉशिंग सेंटरचे सांडपाणी उघड्यावर सोडले जात असल्याने रस्त्यावर सांडपाणी साचत आहे. येथील वाशिंग सेंटरवर वाहने धुणाऱ्यांची मोठी गर्दी असते. मात्र वाहने धुतांना सांडपाणी उघड्यावर सोडले जात असल्याने दूरपर्यंत पाण्याचे लोंढे वाहतात. या सांडपाण्यामुळे ये-जा करणाऱ्यांना त्रास सहन करावा लागत आहे.
----------------------
म्हाडा कॉलनीत पाण्याची गळती थांबली
वाळूज महानगर : म्हाडा कॉलनीतील गळक्या व्हॉल्व्हची दुरुस्ती सिडकोने केली असून पाण्याची नासाडी थांबली आहे. येथील गळक्या व्हॉल्व्हमधून मोठ्या प्रमाणात पाण्याची गळती सुरू असल्याने या परिसरात कमी दाबाने पाणी पुरवठा होत होता.
------------------------------
सारा व्यंकटेशमधील पथदिवे बंद
वाळूज महानगर : सिडको वाळूज महानगर परिसरातील सारा व्यंकटेश या भागातील पथदिवे गत महिनाभरापासून बंद पडले आहेत. पथदिवे बंद असल्याने नागरिक व वाहनधारकांना अंधारातूनच ये-जा करावी लागत आहे. सिडको प्रशासनाकडे तक्रारी करूनही दखल घेतली जात नसल्याची ओरड नागरिकांतून केली जात आहे.
---------------------------------
बजाजनगरातून दुचाकी लंपास
वाळूज महानगर : बजाजनगरातून दुचाकी लांबविणाऱ्या चोरट्याविरुध्द एमआयडीसी वाळूज पोलीस ठाण्यात गुन्हा दाखल करण्यात आला. शरद गोरख दिवटे (रा. इंद्रप्रस्थ कॉलनी, बजाजनगर) यांनी १४ जानेवारीला रात्री दुचाकी ( एमएच २०, ए.के. ९३८६) घरासमोर उभी केली होती. चोरट्‌याने संधी साधून ही दुचाकी चोरून नेली.
--------------------------------
कारचालकाविरुध्द गुन्हा दाखल
वाळूज महानगर : भरधाव व निष्काळजीपणे कार चालवून दुचाकीस्वारास जखमी करणाऱ्या कारचालकाविरुध्द एमआयडीसी वाळूज पोलीस ठाण्यात गुन्हा दाखल करण्यात आला. सिद्धार्थ भास्कर साळवे (२६ रा. वडगाव) हा २१ जानेवारीला दुचाकीने (एमएच१८, एस. ८३१९) जात असताना उद्योगनगरीतील साई हॉटेलसमोर पाठीमागून येणाऱ्या कारने (एमएच २०, सी.एच.२९५३) त्याच्या दुचाकीला धडक दिली. या अपघातात सिद्धार्थ साळवे हा जखमी झाला असून दुचाकीचे नुकसान झाले.
--------------------------