एका कार्यक्रमात मिका सिंगने सूत्रसंचालक करण वाही याच्याशी गप्पा मारल्या आणि आपण स्वत:साठी वधूचा शोध घेत आहोत, असे गमतीत सांगितले; पण लग्नाबद्दल त्याची एक विशिष्ट अट असून, तिचा थेट संबंध या कार्यक्रमाचा ब्रॅण्ड ॲम्बॅसडर सलमान खानशी आहे. त्याने सांगितले, “मला लग्न करायचं असून, त्यासाठी मी योग्य मुलीचा शोध घेत आहे. कदाचित मला सुयोग्य नवरी सापडेलही, पण सलमान खानने लग्न केल्यानंतरच मी लग्न करणार आहे. ही माझी अट आहे. तोपर्यंत मी सिंगल जीवन मजेत जगणार आहे. साजिद भाईने म्हटल्याप्रमाणे सलमान भाईनंतर बॉलिवूडच्या जगात केवळ मीच अविवाहित तरुण असेन. मला हे बिरूद जास्तीत जास्त काळ मिरवायचं आहे!”
'ती परत येतेय'
लय भारी चित्रपटातील नंदिनी आठवतेय का तुम्हाला.... नंदिनीचा तो ग्लॅमरस रोल पडद्यावर साकारला होता, अभिनेत्री आदिती पोहणकर हिने. या चित्रपटानंतर ती चित्रपटसृष्टीत फारशी दिसली नाही. या चित्रपटानंतर तिने ‘ट्रकभर स्वप्नं’ या चित्रपटातून मराठी पडद्यावर कमबॅक केले होते. त्यानंतर ती 'शी' या वेबसीरिजमध्ये झळकली होती. तिच्या सीरिजला प्रेक्षकांचा खूप चांगला प्रतिसाद मिळाला होता. आता 'शी' या वेबसीरिजचा दुसरा सीझन लवकरच भेटीला येणार आहे. आदितीनेच फोटो शेअर करत याची माहिती दिली. तिने लिहिले, 'ती (शी) परत येतेय' आम्ही तयार आहोत. भूमी २०२१ मध्ये परत येणार आहे; पण ती कोणाच्या बाजूने आहे ?
पंजाबी ड्रेसमध्ये खुलले मौनी रॉयचे सौंदर्य
मौनी रॉय एक अभिनेत्री आणि मॉडेल आहे. मौनी रॉय कॉलेजच्या दिवसांत कोरिओग्राफर म्हणून काम करत होती. ती सोशल मीडियावर कधी ट्रेडिशनल लूक, तर कधी ग्लॅमरस लूकमुळे चर्चेत येत असते. नुकतेच तिने आपले एक हटके फोटोशूट शेअर केले आहे. यात ती लाल रंगाच्या पंजाबी ड्रेसमध्ये दिसत आहे. हे फोटो शेअर करत तिने लिहिले की, 'लाली मेरे लाल की जित देखूं उत लाल, लाली देखन मै गयी मैं भी हो गयी लाल...'. मौनी रॉयने जामिया मिलिया इस्लामिया युनिव्हर्सिटी, दिल्लीमधून इंग्रजी ऑनर्स आणि जनसंचार कोर्स केला आहे. त्यानंतर तिने टीव्ही जगतात एन्ट्री केली.