सोयगाव : जरंडी कोविड केंद्रातील १७ रुग्णांपैकी तिघांना अचानक अशक्तपणा जाणवल्याने तातडीने त्यांना पाचोरा (जि. जळगाव) येथील खासगी रुग्णालयात ऑक्सिजनच्या सुविधेसाठी हलविण्यात आले आहे. प्रशासनाकडून सोयगाव तालुक्यातील रुग्णांना ऑक्सिजन सुविधा उपलब्ध नाही. सोयगाव कोविड केंद्राचे अद्यापही काम पूर्ण झाले नसल्याने जिल्हाधिकाऱ्यांनी मंजूर केलेल्या ऑक्सिजननिर्मिती प्रकल्पाचे कामही रेंगाळले आहे. त्यामुळे पुन्हा सोयगाव तालुक्याला ऑक्सिजनसाठी खासगी रुग्णालये जवळ करावी लागणार आहेत.
जरंडी कोविड केंद्रात १७ रुग्ण उपचार घेत असून, त्यापैकी तिघांना अचानक श्वसनाचा त्रास जाणवू लागल्याने ऑक्सिजनअभावी त्यांची प्रकृती गंभीर झाली होती. त्यामुळे त्यांना इतरत्र हलविण्यात आले. सोयगाव केंद्रासाठी जिल्हाधिकारी कार्यालयाकडून ऑक्सिजननिर्मिती प्रकल्पासाठी ४२ लाखांचा निधी उभा केला आहे. मात्र, केंद्राचेच काम अपूर्ण असल्याने प्रकल्प उभारणीस अडचणी येत आहेत. तब्बल ९ महिन्यांपासून या केंद्राचे बांधकाम सुरू आहे. त्यामुळे जरंडीच्या कोविड केंद्रावरच रुग्णांचा भार आला आहे; परंतु त्या तुलनेत सुविधा नाही. ऑक्सिजनसाठी रुग्णांना औरंगाबादचे १२५ कि.मी.चे अंतर पार करावे लागते.
--------
दुसऱ्या लाटेत ५८ जणांचा मृत्यू
कोरोना संसर्गाच्या दुसऱ्या लाटेत सोयगाव तालुक्यात ५८ रुग्णांचा मृत्यू झाला आहे. यापैकी तब्बल ३० रुग्णांना ऑक्सिजनअभावीच आपला जीव गमवावा लागला आहे; परंतु अद्यापही त्याअनुषंगाने कुठल्याच उपाययोजना प्रशासनाकडून करण्यात आल्या नाहीत. त्यामुळे कोरोना संसर्गाची संभाव्य तिसरी लाट धोक्याची घंटा ठरते की काय, अशी शंका आहे. सोयगाव तालुक्यातील १४ रुग्णांना जरंडीच्या कोविड केंद्रात उपचारासाठी दाखल करण्यात आले आहे.