पाच शासकीय कार्यालयांमध्ये दोन जण पॉझिटिव्ह
औरंगाबाद : शहरातील पाच वेगवेगळ्या शासकीय कार्यालयांमध्ये येणाऱ्या नागरिकांची शुक्रवारी तपासणी करण्यात आली. त्यामध्ये दोन जण पॉझिटिव्ह आढळून आले. महापालिका मुख्यालयात ३० पैकी २ जण पॉझिटिव्ह आढळून आले. पोलीस आयुक्त कार्यालय ४२, जिल्हाधिकारी कार्यालय ८०, विभागीय आयुक्त कार्यालय ३५, आरटीओ कार्यालय ७५ नागरिकांची तपासणी केली.
रेल्वेस्टेशन, विमानतळावर १९३ प्रवाशांची तपासणी, ३ पॉझिटिव्ह
औरंगाबाद : महापालिकेच्या आरोग्य विभागाने शुक्रवारी रेल्वे स्टेशन आणि विमानतळावर १९३ प्रवाशांची तपासणी केली. गुरुवारी रेल्वेस्टेशनवर १०८ प्रवाशांची तपासणी केली होती त्यामधील तीन जण आज पॉझिटिव्ह आढळून आले. जाधववाडी भाजीमंडई येथे फक्त ९ जणांनी तपासणी केली.
३ मालमत्ता सील, एक नळ खंडित
औरंगाबाद : मालमत्ताकराच्या थकबाकीसाठी प्रशासनाने विशेष पथक स्थापन केले आहे. या पथकाने शुक्रवारी दिवसभरात फक्त १ लाख ३२ हजार रुपये वसूल केले. तीन ठिकाणी मालमत्ता सील केल्या. थकबाकी न भरल्याने एका ठिकाणी नळ कनेक्शन खंडित करण्यात आले. विशेष पथकाकडून ज्या पद्धतीने वसुली व्हायला हवी तशी होत नसल्याचे दिसून येत आहे.
१९ हजार ६५० रुपये दंड वसूल
औरंगाबाद : महापालिकेच्या नागरीमित्र पथकाने गुरुवारी शहरात १९ हजार ६५० रुपये दंड वसूल केला. मास्क न लावलेल्या ३३ नागरिकांकडून १६ हजार ५०० रुपये वसूल करण्यात आले. याशिवाय वेगवेगळ्या कारणावरून नागरिकांना दंड आकारण्यात आला.