लोणी खुर्द/ वैजापूर : जमिनीच्या क्षुल्लक वादातून नातवाने डोक्यात वरवंटा घालून चुलत आजोबांचा खून केल्याची घटना तालुक्यातील चिकटगाव येथे मंगळवारी घडली. उत्तम महादू निकम (६५) असे मयत इसमाचे नाव आहे. या घटनेने गावात खळबळ उडाली आहे.
चिकटगाव येथील रहिवासी उत्तम निकम व महादू निकम या दोन भावांमध्ये शेतीतील खळ्याच्या जागेवरून जुना वाद होता. यामुळे त्यांचे वेळोवेळी भांडणे होत असत. उत्तम निकम हे शेतात राहत होते. मंगळवारी सकाळी ११ वाजता या दोघांमध्ये जागेवरून पुन्हा वाद झाला. यामुळे मोहन निकम यांचा नातू भाऊसाहेब चंद्रकांत निकम (२८) शेतात गेला. त्याने उत्तम निकम यांच्या घरात जाऊन त्यांच्याशी वाद घालीत वरवंटा उचलून त्यांच्या डोक्यात घातला. यामुळे उत्तम निकम हे गंभीर जखमी होऊन जमिनीवर कोसळले. नातेवाईक व कुटुंबीयांनी त्यांना तत्काळ औरंगाबादेतील घाटी रुग्णालयात उपचारासाठी हलविले. तेथे उपचारादरम्यान सायंकाळी साडेसहा वाजेदरम्यान त्यांचा मृत्यू झाला. घटनास्थळी शिऊर पोलीस ठाण्याचे सपोनि. गोरख शेळके यांनी भेट देऊन घटनेचा पंचनामा केला. आरोपी भाऊसाहेब हा फरार झाला होता; परंतु पोलिसांनी तपासाची चक्रे फिरविली. आरोपी हा वैजापूर येथील खान गल्लीत लपलेला असल्याची माहिती मिळताच पोलीस अंमलदार कुलदीप नरवडे, गणेश गोरक्ष जमादार सुभाष बकले, पोना. विष्णू जाधव, किरण रावते, अमोल मगर यांनी आरोपीला पाठलाग करुन जेरबंद केले.