टमटम-रिक्षा अपघात; डोकेवाडीचे दाम्पत्य ठार

ईट : भरधाव वेगातील मालवाहतूक टमटम- प्रवासी वाहतूक रिक्षाची समोरासमोर जोराची धडक होऊन झालेल्या अपघातात पती-पत्नीचा मृत्यू झाला तर इतर तिघे जखमी झाले़ हा अपघात मंगळवारी सकाळी भूम तालुक्यातील ईट गावाजवळील रेणुकादेवी मंदिराजवळ घडला़सूत्रांकडून मिळालेल्या माहितीनुसार, भूम तालुक्यातील ईट गावाजवळील रेणुकादेवी मंदिराजवळ डोकेवाडीकडून ईटकडे जाणाऱ्या रिक्षाची (क्ऱएम़एच़२५-एम़८६५) मंगळवारी सकाळी ईटहून भूमकडे जाणाऱ्या मालवाहतूक टमटमशी (क्ऱएम़एच़२५- पी़२५८०) जोराची धडक झाली़ यात साखरबाई आण्णा आहेर (वय-३५ रा़डोकेवाडी) यांचा जागीच मृत्यू झाला़ तर जखमी आण्णा बळीराम आहेर (वय-४२ रा़डोकेवाडी) यांना उपचारासाठी भूमकडे नेताना त्यांचा वाटेतच मृत्यू झाला़ अपघातात पती-पत्नींचे निधन झाले तर त्यांचा दोन वर्षांचा मुलगा बालंबाल बचावला आहे़ तर रिक्षाचालक सागर बबन खैरे (वय-२२) हा किरकोळ जखमी झाला असून, ईशवर बाबा शेजाळ (वय-३५) व टमटम चालक अमोल धोंडिबा करडकर (वय-३० रा़ मात्रेवाडी) हे जखमी झाला असून, त्यांना उपचारासाठी बार्शी येथील रूग्णालयात नेण्यात आले आहे़ अपघातानंतर औटपोस्ट ईटचे पोहेकॉ रामदास भालेराव यांनी सहकाऱ्यांसह तत्काळ घटनास्थळी धाव घेवून घटनेचा पंचनामा केला़ या अपघाताची वाशी ठाण्यात नोंद करण्याची प्रक्रिया सुरू होती़