आरोग्य विद्यापीठाच्या प्रशासकीय इमारतीचा शिलान्यास समारंभ आज

औरंगाबाद : महाराष्ट्र आरोग्य विज्ञान विद्यापीठाच्या प्रशासकीय इमारतीचा शिलान्यास समारंभ आज, मंगळवारी राज्याचे वैद्यकीय शिक्षण मंत्री अमित देशमुख यांच्या हस्ते औरंगाबाद विभागीय कार्यालयात आयोजित करण्यात आला आहे. दुपारी साडेचार वाजता होणाऱ्या या कार्यक्रमास विद्यापीठाचे प्रभारी कुलगुरू डॉ. नितीन करमळकर, माजी कुलगुरू डॉ. दिलीप म्हैसेकर, कुलसचिव डॉ. कालिदास चव्हाण व विविध प्राधिकरण सदस्य उपस्थित राहणार आहेत. सिडको एन-२, सर्व्हे क्रमांक ६०, मुकुंदवाडी येथे औरंगाबाद विभागीय केंद्राची इमारत होणार आहे. या समारंभात मान्यवरांच्या हस्ते ‘ध्येय : शून्य टक्के रॅगिंग’ या पुस्तिकेचे प्रकाशन करण्यात येणार असून, आरोग्य क्षेत्रात उल्लेखनीय कार्य करणाऱ्या डॉ. अरुण महाले, डॉ. इंदुप्रकाश गजभिये, डॉ. शरद कोकाटे यांना जीवनगौरव पुरस्कार, तर दंत विद्याशाखेतील पुरस्कार डॉ. रमेश गांगल यांना तसेच होमिओपॅथी विद्याशाखेतील पुरस्कार डॉ. अरुण भस्मे यांना देण्यात येणार आहे. या समारंभास मोठ्या संख्येने उपस्थित राहावे, असे आवाहन विद्यापीठाचे कुलसचिव डॉ. कालिदास चव्हाण यांनी केले आहे.