बॉलिवूड सुपरस्टार आमिर खान आणि अभिनेत्री एली अवरामच्या डान्स व्हिडिओची पहिली झलक समोर आली आहे. एली अवरामने इन्स्टाग्रामवर नव्या गाण्यातील लूक शेअर केला आहे, ज्यात आमिरसोबत एका वेगळ्या स्टाइलमध्ये दिसते आहे. फोटोमध्ये एली आणि आमिर खान रोमँटिक स्टाइलमध्ये दिसतायेत. विशेष म्हणजे, गाण्यासाठी आमिर खानने स्वतःचा लूक डिझाइन केला आहे. यापूर्वी गाण्याच्या शूटिंग दरम्यानचा एक व्हिडिओ आला होता. यात आमिर खूप मस्तीच्या मूड दिसत होता. आमिर ‘लालसिंग चड्ढा’च्या शूटिंगमध्ये ब्रेक घेऊन जयपूरला या गाण्याचे शूटिंग करण्यासाठी गेला होता.
जुही आणि आयशा करणार डिजिटल माध्यमात पदार्पण
‘हश हश’च्या निमित्ताने पुरस्कार विजेत्या अभिनेत्री जुही चावला आणि आयशा झुल्का डिजिटल माध्यमात पदार्पण करणार आहेत. त्यांच्याबरोबर या सिरीजमध्ये कृतिका कामरा, करिश्मा तन्ना, सोहा अली खान, शहाना गोस्वामी यांच्याही प्रमुख भूमिका असणार आहेत. ही कहाणी मूलत: स्त्रियांच्या नजरेतून उलगडणारी असून, स्वत:ची कहाणी सांगणाऱ्या महिलांच्या कथेतून अनेक पैलू उलगडत जाणार आहेत. ‘हश हश’साठी प्रोडक्शन डिझायनर, कॉस्च्युम डिझायनर, सुपरवायझिंग प्रोड्युसर, को-प्रोड्युसर्सपासून ते आर्ट, कॉस्च्युम, प्रोडक्शन कोऑर्डिनेशनपासून ते अगदी सिक्युरिटी टीमपर्यंत बहुतेक सर्व तांत्रिक कामेही स्त्रियाच सांभाळणार आहेत.
ग्लॅमरस फोटोशूटने श्रेया बुगडेने वेधले लक्ष
श्रेया बुगडे गेल्या अनेक वर्षांपासून मराठी इंडस्ट्रीत काम करत आहे; पण तिला खऱ्या अर्थाने लोकप्रियता ‘चला हवा येऊ द्या’ या कार्यक्रमामुळे मिळाली. तिने सोशल मीडियावर शेअर केलेल्या फोटोंची सध्या चांगलीच चर्चा रंगली आहे. श्रेयाने नुकतेच तिचे व्हाइट ड्रेसमधले फोटो शेअर करत सगळ्यांचे लक्ष वेधले आहे. यात ती प्रचंड ग्लॅमरस दिसत आहे. ‘काहीच सिद्ध करायचे नाही, मी जशी आहे तशी पुरेशी आहे’, असे कॅप्शन तिने यावर दिले आहे. श्रेयाचा हा अंदाज तिच्या फॅन्सना प्रचंड आवडत आहे. श्रेयाने गेल्या काही वर्षांत तिच्या कॉमिक टायमिंगने प्रेक्षकांचे मन जिंकले आहे. त्याचसोबत ‘समुद्र’ या नाटकात ती एका गंभीर भूमिकेत दिसली होती. या नाटकातील तिच्या आणि चिन्मय मांडलेकरच्या भूमिकेचे प्रेक्षकांनी प्रचंड कौतुक केले होते.