तरुणावर गोळीबार; बालंबाल बचावला

क्रिकेटचा सराव करुन मित्रासोबत घरी निघालेल्या तरुणावर अज्ञात हल्लेखोरांनी ४ फायर केले. तरुणाने प्रसंगावधान राखत ३ गोळ्या चुकविल्या तर १ गोळी त्याच्या पोटाला चाटून गेली.

लोकमत न्यूज नेटवर्कबीड : क्रिकेटचा सराव करुन मित्रासोबत घरी निघालेल्या तरुणावर अज्ञात हल्लेखोरांनी ४ फायर केले. तरुणाने प्रसंगावधान राखत ३ गोळ्या चुकविल्या तर १ गोळी त्याच्या पोटाला चाटून गेली. यामध्ये जखमी झालेल्या तरुणाला जिल्हा रुग्णालयात दाखल करण्यात आले. यावेळी मोठा जमाव रुग्णालय परिसरात जमला होता. याठिकाणी तगडा पोलीस बंदोबस्त लावला होता.शेख सर्फराज अब्दुल सलाम (वय ३६, रा.भालदारपुरा, बीड) असे हल्ला झालेल्या तरुणाचे नाव आहे. सर्फराज हे नियमित जिल्हा क्रीडा संकुलात क्रिकेटचा सराव करण्यासाठी मित्रांसोबत येतात. रविवारीही सराव केल्यानंतर सायं. ७ च्या सुमारास तो आपल्या दुचाकी (एमएच२३/३५५५) वरुन मित्र मोहसीन (मोमीनपुरा) सोबत घरी निघाला होता. सुभाष रोड, डॉ. आंबेडकर पुतळामार्गे चांदणी चौकात येताच अज्ञात हल्लेखोरांनी त्याच्यावर ४ फायर केले. परंतु सर्फराजने प्रसंगावधान राखून ३ गोळ्या चुकविल्या तर १ गोळी त्याच्या पोटाच्या डाव्या बाजूला चाटून गेली. यामध्ये जखमी झालेल्या सर्फराजला तात्काळ भाऊ शेख रियाज यांनी जिल्हा रुग्णालयात दाखल केले. ही माहिती वाºयासारखी पसरताच मित्र, नातेवाईकांनी रुग्णालयात धाव घेतली. त्यामुळे याठिकाणी मोठा जमाव जमला होता.जमावाला पांगविण्यासाठी राज्य राखीव दलाचे जवान बोलाविण्यात आले होते. रात्री उशिरापर्यंत गुन्हा दाखल झालेला नव्हता. पोलीस अधिकारी तळ ठोकून होते.