ऑनलाईन लोकमत
पाथरी (जि. परभणी ), दि. ३ : पाऊस नसल्याने शेतातील पिके हातची गेली आहेत त्याचा पंचनामा करा, गुरांना चारा उपलब्ध करून द्या, पाणी प्रश्न सोडवा , दुष्काळ जाहीर करा या मागण्यांसाठी शेतक-यांनी आज बैलगाडी मोर्चा काढला. तहसील कार्यालयावर काढलेल्या या मोर्चात लोणी बु येथील शेतकरी मोठ्या संख्येन सहभागी झाली होती.
दुपारी १ च्या दरम्यान शहरातील मोंढा परिसरातून हा मोर्चा काढण्यात आला. लोणी येथील शेतक-यांसोबत या मोर्चात शिवसेना तालुका प्रमुख रवींद्र धर्मे, तालुका संघटक मुंजाभाऊ कोल्हे, रावसाहेब निकम, ज्ञानेश्वर धर्मे यांचा सहभाग होता. तहसीलदार यांना यावेळी शेतक-यांनी मागणीचे निवेदन दिले. पीक पंचनामे करा, दुष्काळ जाहीर करा, गुरांना चारा उपलब्ध करून घ्या व गावातील पाणी टंचाई सोडवा अशा शेतक-यांच्या मागण्या आहेत.