बनावट तृतीयपंथीयास खर्‍या तृतीयपंथीयांनी चोपले

नांदेड : तृतीयपंथी नसतांनाही असल्याचे भासवून आनंदनगर भागात दुकानदारांकडून पैसे गोळा करणार्‍या एका युवकाला खर्‍या तृतीयपंथीयांनी पकडून चांगलाच चोप दिला़ ही घटना गुरूवारी दुपारी आनंदनगर भागात घडली़ तृतीयपंथीयांना समाजाकडून सन्मानाची वागणूक मिळत नसल्याने अनेक तृतीयपंथी बाजारपेठ, आठवडी बाजार आणि रेल्वे आदी ठिकाणी फिरून लोकांकडून पैसे मागून आपली उपजिविका भागवित असतात़ दरम्यान, काही लोक या सहानुभूतीचा फायदा घेण्यासाठी आपण तृतीयपंथी असल्याचे भासवून लोकांकडून पैसे उकळण्याचा उद्योग करीत आहेत़ अशाच एका युवकाला रंगेहात पकडून काही तृतीयपंथीयांनी भरदिवसा रस्त्यावर कपडे काढून बदडले़ या युवकाने केवळ पैसे कमविण्याच्या दृष्टीने असा खटाटोप सुरू केला होता़ सदरील युवकाजवळ असलेल्या पिशवीमध्ये पॅन्ट, शर्ट आणि इतर साहित्य मिळाले़ तृतीयपंथी असल्याचे भासवित लोकांची फसवणूक करणार्‍या अशा बनावट लोकांमुळे खर्‍या तृतीयपंथीयांना लोकांकडून योग्य वागणूक दिली जात नाही़ घटनास्थळी पोलिस कर्मचारी गेले होते, मात्र तोपर्यंत वाद मिटलेला होता़ यासंदर्भात कोणीही तक्रार दिली नसल्याचे विमानतळ पोलिस ठाण्याचे पोलिस निरीक्षक पीसे यांनी सांगितले़ (प्रतिनिधी)