औरंगाबाद : शिर्डी येथील साईबाबा संस्थानमधील कायम, कंत्राटी व बाह्यस्त्रोत कर्मचाऱ्यांना वेतन देण्याची परवानगी न्या. एस. पी. देशमुख आणि न्या. एस. डी. कुलकर्णी यांनी मंगळवारी (दि.१०) संस्थानच्या तदर्थ समितीला दिली. तसेच कोरोना महामारीत आरोग्यसेवक म्हणून काम करणाऱ्या कर्मचाऱ्यांना ४० टक्के वाढीव वेतन देण्यास सुद्धा परवानगी दिली .
साईबाबा संस्थानने ३१ ऑक्टोबर २०२० रोजी कायम, कंत्राटी व बाह्यस्त्रोत कर्मचाऱ्यांना वेतन देण्याचा आणि आरोग्यसेवकांना ४० टक्के वाढीव वेतन देण्याचा निर्णय बहुमताने घेतला होता. सदर ठरावानुसार परवानगीसाठी संस्थानने खंडपीठात अर्ज दाखल केला होता. शासनामार्फत नवीन विश्वस्त नियुक्त होईपर्यंत अहमदनगरचे प्रधान जिल्हा न्यायाधीश, साईबाबा संस्थानचे मुख्य कार्यकारी अधिकारी, नाशिकचे अतिरिक्त विभागीय आयुक्त, आणि अहमदनगरचे सह धर्मादाय आयुक्त यांची समिती गठित करून त्यांना धोरणात्मक व आर्थिक निर्णय घेण्याचे अधिकार ९ ऑक्टोबर २०१९ च्या आदेशान्वये दिले होते. सदर समिती ऑक्टोबर २०१९ पासून साईबाबा संस्थानचा कार्यभार सांभाळत आहे . खंडपीठाच्या परवानगीने धोरणात्मक व आर्थिक निर्णय घेत आहे. याचिकाकर्त्यांच्यावतीने ॲड. सतीश तळेकर आणि प्रज्ञा तळेकर यांच्या वतीने अजिंक्य काळे व किरण नगरकर यांनी काम पहिले, संस्थानच्या वतीने ॲड. अनिल बजाज व शासनाच्या वतीने ॲड. डी .आर .काळे यांनी काम पाहिले.