औरंगाबाद : बळिराम पाटील चौक परिसरात एका मद्यधुंद कारचालकाने एका दुचाकीसह दोन वाहनांना उडविले. ही घटना रात्री नऊ वाजण्याच्या सुमारास घडली आहे. यातील दुचाकीवरील गंभीर जखमी झालेल्या दोनजणांना उपचारासाठी घाटी रुग्णालयात दाखल केले. जखमीतील एकाची परिस्थिती चिंताजनक असल्याची माहिती सिडको पोलिसांनी दिली.
बळिराम पाटील चौकातून जाताना भरधाव वेगाने जाणाऱ्या कारने (एम.एच. २०, एफ.जी. २४४९) एका वाहनाला उडविले. त्यानंतर दुचाकीला जोराची धडक दिली. दोन वाहने उडविल्यानंतर तिसऱ्या गाडीला धडक दिली आहे. या धडक देणाऱ्या कारमध्ये सुमित कैलाश केदार (वय ३२, रा. जाधववाडी) आणि रूपेश सखाराम आपत (३७, रा. नागसेननगर, टी.व्ही. सेंटर) हे दोघे आढळून आले. त्यातील एकजण मद्य जास्त प्राशन केल्यामुळे गाडीतच झोपून होता. दुसऱ्या चालकाला पोलिसांनी पकडून वैद्यकीय तपासणीसाठी घाटी रुग्णालयात घेऊन गेले असल्याची माहिती सिडको पोलिसांनी दिली.
चौकट,
सिडको उड्डाणपुलाच्या कठड्यावर कारची धडक
सेव्हल हिलकडून सिडकोकडे जात असलेल्या एका कारने (एम.एच.२०, डी.जे. ३८७२) उड्डाणपूल सुरू होत असताना असलेल्या डिव्हायडवर जोराची धडक दिली. ही धडक एवढी जोराची होती की, गाडी तीन वेळा उलटली. या अपघातात एकजण किरकोळ जखमी झाला. त्यास खासगी रुग्णालयात उपचारासाठी नेण्यात आले.