मूत्ररोग विभागाला उधारीवरील डॉक्टराचे सलाईन

औरंगाबाद : नेफ्रो-युरॉलॉजी विभागासाठी डॉक्टर्स आणि अन्य कर्मचाऱ्यांची पदनिर्मिती तसेच यंत्रसामुग्री खरेदी करण्यात आली नसल्यामुळे आजही या विभागाला कुलूप लागलेले आहे.

औरंगाबाद : घाटी रुग्णालयात सहा महिन्यांपूर्वी उद्घाटन झालेल्या नेफ्रो-युरॉलॉजी विभागासाठी डॉक्टर्स आणि अन्य कर्मचाऱ्यांची पदनिर्मिती तसेच यंत्रसामुग्री खरेदी करण्यात आली नसल्यामुळे आजही या विभागाला कुलूप लागलेले आहे. सर्जरी विभागाच्या बाह्यरुग्ण विभागात दाखल होणाऱ्या एकूण रुग्णांपैकी मूत्ररुग्णांची संख्या सरासरी ३० टक्के असते. या रुग्णांचे ओझे मात्र केवळ तीन महिन्यांच्या प्रतिनियुक्तीवर असलेल्या एका मूत्ररोगतज्ज्ञाच्या खांद्यावर आहे. घाटी रुग्णालयाच्या सर्जरी विभागांतर्गत सध्या मूत्ररोग विभाग आहे. मराठवाडा आणि शेजारील जिल्ह्यांतील मूत्ररोगाने त्रस्त रुग्ण उपचारासाठी थेट घाटीत दाखल होतात. सर्जरी विभागाच्या ओपीडीमध्ये रोज सरासरी २५० रुग्ण दाखल होतात. त्यापैकी ३० टक्के रुग्ण जन्मत: लघवीचा मार्ग नसलेले चिमुकले, मूत्रखड्याचे रुग्ण, प्रोस्टेट ग्रंथींची वाढ झालेले, लघवीचा मार्ग अरुंद झालेले, पुरुष वंध्यत्वासंबंधी उपचार, किडनी कॅन्सर रुग्णांची संख्या अधिक आहे. अशा रुग्णांवर मूत्ररोगतज्ज्ञच दुर्बीणद्वारे अथवा शस्त्रक्रिया करण्यात येते. खाजगी रुग्णालयातील उपचार गरीब रुग्णांना परवडत नाही, त्यामुळे ते थेट घाटीत येतात. रुग्णांची गरज ओळखून शालेय शिक्षणमंत्री राजेंद्र दर्डा यांनी घाटी रुग्णालय अभ्यागत समितीचे अध्यक्ष असताना नेफ्रो-युरॉलॉजी विभागासाठी स्वतंत्र इमारतीसाठी निधी मंजूर करून आणला. इमारतीचे बांधकाम पूर्ण झाले. घाटी प्रशासनाने नेफ्रो-युरॉलॉजी विभागासाठी स्वतंत्र पदनिर्मिती आणि इन्स्ट्रूमेंट खरेदीचा प्रस्ताव शासनास सादर केला. प्रस्ताव पाठवून तीन वर्षे झाले तरी या प्रस्तावावर कोणताही निर्णय झाला नाही. केवळ तीन महिन्यांसाठीच प्रतिनियुक्तीरुग्णांची गरज लक्षात घेऊन घाटी प्रशासनाने मुंबईत कार्यरत असलेले मूत्ररोगतज्ज्ञ डॉ. व्यंकट गिते यांना घाटीत तीन महिन्यांसाठी प्रतिनियुक्ती दिली. मात्र, येथे दाखल होणाऱ्या रु ग्णांची संख्या अधिक असल्याने घाटी प्रशासन वैद्यकीय शिक्षण संचालकांना दर तीन महिन्यांतून एकदा पत्र पाठवून डॉ. गिते यांना पुन्हा प्रतिनियुक्ती देण्याची विनंती करते. त्यानंतर कोठे या मूत्ररोगतज्ज्ञाला पुन्हा तीन महिन्यांसाठी प्रतिनियुक्ती देण्यात येते. आता त्यांच्या प्रतिनियुक्तीचा कालावधी केवळ चार दिवस शिल्लक असल्याचे सूत्राने सांगितले.